Thuthangtha simtu – Rev. Fr. Dominic Thawm Hlei Hnin

Caantluang Zarhpi veihnihnak –Year C

January 19, 2025

Canan khua ih nupi thitnak cu rundamnak thuanthu a si

Siar dingmi Bible pawl Is 62:1-5, Ps 95:1-3,7-10, 1Cor 12:4-11, Jn 2:1-11

A liamciami zarh hnih zoh kir sal sehla zaeh hmaisa cu mifim pawl in naute Jesuh cu an va biak ih suahlawmnak thilri an pe. Cui mifim pawl ih pek mi thilri cun naute Jesuh cu miali a sinak, Siangpahang a sinak Pathian a sinak tivek an pholang thlang ruangah Pathian ih a mah le a mah a phuan lang awknak pipheng asi.

Kan dung zaehah Jesuh cu tihnimnak pek a siih cumi khalah van ih awthawng in Jesuh cu zo asi ti a phuang. Cu ruangah Epiphany asi ve.

An pathum in Pathian a mah le mah phuan awknak a si ruangah Epiphany an si cio. Kan bible sung hmun tampi ah kan Bawipa Jesuh in Vancungram thu a zirh duh ti vek mo lawmnak le rawl ei nak thawn tahthim nak a pe theu.

Milai kan san sungah ni cungcuang hleice nitnum kan nei an ti theu ih cu pawl cu kan suah ni, kan thihni le nupi pasal kan neih ni asi. Kan suahni ah nu le pa ulenau sung le khat pawl in an thei ih an lung a awi cio. Khawpi hrekkhat cun an theilo. Kan mah lala khalin kan thei aw lo. Kan thih tikah riahsiatnak kan phur tlang nan kan mah cun kan thei aw cuang lo. Nupi pasal kan neih tikah kan mah le mah khal kan thei aw tengtengti lawng siloin cuini hrangah a thabik in tim kan tuah ih lungawi nak kan nei cio.

Cu vekin vancungram khal cu thei aw tengteng ih nuam aw ding, Pathian kan hmuh nakah diriam zet ding kan si ruangah nupithitnak le rawlei nak thawi tahthim nak in peknak san asi.

Cun nupithitnak a um tikah sung le khat, rual le pi kan hlam aw kan sawm aw. Curuangah milai sinak ah pehtliah awknak in neiter tu le pumkhat ah in komawk tertu a si ih a thupi zet.

Kan pu kan pa pawl ih sanlai ah an te an fa hrangih nupi an dil tikah nupian bia kan ti theu ih zubel an put theu. Nupi an thit tik cu khalah zu thawthaw an suah ih ruai an theh, mo an lawm.

Judah pawl ih nupi thitnak khalah cuvek thotho in an rak hman. Sabitti thawthaw kha suah in mo an lawm. Canan khua nupi thit nak ah Jesuh ih nu khalin a telpi veih Jesuh le a dungthluntu pawl khal sawm an si ve vekin an tel ve.

Nuam dutdo in mo an lawm rero laiah an sabitti a rak cem. Cucu moni le mopa in an thei lo. Ruaitla hotu khal in a thei lo. A sinan Jesuh ih nu in a rak thei.

Monu le mopa in thei hai sehla ziangtluk in an ningzak pei? Ruaithla hotu in thei sehla san ka tlai lo ti aw in a ning a zak ding. Mo lawmtu mipi in thei hai sehla cu cui molawmnak sunglawi cu mualpho nak a cang ding.

Mi mual kan pho ding in sianglotu le ka fapa in ziang a tuahthei ti a theifiang tu Jesuh ih nu in a fapa Jesuh ih hnenah “Sabitti an nei nawnlo” tiah a va sim. A lenglei in “bawm aw” a ti thawn a bang aw.

Himi caan tiangah thil danglam zianghman a um hrih lo. Hi tawk lawngin danglam nak a thok. Jesuh in a nu ih a va simmi cu a rak sawn ih “Nunaunu nang le kei, ziang kan pehtlaih aw! ka tikcuu caan a kim hrih lo” tiah a rak ti.

Kan laitong ih lehmi Bible hrekkhat ahcun “ka nu, i sim duh hlah, ka tikcuu a kim hrih lo” tin an let. Minung cu famkim kan um lo ti cu a sinan hi bible lettu in Bible thu lehdan thei hnai loin “mirang tong ka thiam aw poh” tiih lehmi a si ri an tlaksam nak a pho lang.

Jesuh hnen ih sabitti an nei nawn lo tiih a ra simtu cu Jesuh ih nu a si ti cu a dik zet nan, Jesuh in milai tlaksiat nak thu le rundamnak thu a vun kaikawh duh ruangah “Nunaunu” tiin a mah hringtu nu kha a rak sawn.

A luhlul ruangah a silo. A tuah ding mi a theih ih cucu rundamnak thwai pehparter a duh ruangah asi sawn. Semtirnak 3:1-24 sung kan zoh sile Rulpi in siseh, Adam in siseh Pathian in siseh “Nunaunu” an ti nak kan hmu. Cumi ah Pathian in rulpi ih hnenah “nangmah le nunaunu, Na tesinfa le a tesinfa karlak ah ral siseh nan cang ding” tiin kan hmu.   

Himihi milai ih thlaksiatnak a si vekin rulpi ih lu a pal tu ding rundamtu ih ratnak ding hrangah ruahsannak in neiter lohli. Hi mi thuhla milai tlaksiatnak thu a bun kaikawh duh ruangah Jesuh in a nu cu “ka nu” tiah ko men loin “Nunaunu” a tu nak asi.

Cun Jesuh in “ka tikcu a kim hrih lo” tiah a ti bet. Jn 13:1 “Jesuh in hi leitlun fehsan in a Pa hnenih a feh ding tikcu caan a ra thleng zo ti kha a thei” ti kan hmu.

Mi 26:45 Milai fapa cu misual pawl kut sungih thlenter a sinak Mk 14:41 tikcuu a thleng zo. Lk 22: 14 A tikcu a liam tikah Jesuh cabuai ah a to ih a dungthluntu pawl hnenah hi lantak zaanriah hi harsatnak ka tuar hlanah nanmah thawn eitlang dingah a duh zet.

Milai fapa in sunlawihnak a ngahnak tikcu caan Jn 12-23 a ra thleng zo.

Jn 17:1 Ka fapa a tikc a ra thleng zo. A fapa in sunlawihnak a lo pek theinak dingah na fapa hnenah sunlawihnak run pe aw.

Gal 4:4 A tikcuu caan a kim tikah Pathian in a fapa a runthlah.

Kan Bawipa Jesuh cu a tikcu can a kim lawngah lei parah a rungsuak. A tikcu caan a leilung ah sunlawih a siih a tikcu caan a kim tikah a mah le mah Pathian hnenah a sum aw aw. A tikcu caan a kim timi hi rundamnak thu tawi pehpar aw mi tikcu asi.

A tikvcu a kim hlan hlanah cun an kai thei lo. Himi Canan khua ih a tongmi tikcu cu a mah le mah a pek awk ding tikcu a rak si.

Bible thiam pawl in a sansan ih an pom ringring mi cu himi tikcu caan ih simduhmi cu a mah Jesuh ih zonzaih tuarnak, thihnak thawsalnak le vancung kainak tikcu asi.

A fapa ih lungput a theitu a nu cun hnenum pawl hnenah “ a lo fialmi poh tuah uh” tiah a cah ta.

Jesuh ih hnenum pawl hnenah “ralcabel pawl ah tidai thun khat thluh uh” tiah a fial ih cuihnu ah cui beel sung ih tidai cu a suahter ih a lak le lawh ah sabitti ah a rak cang zo.

Pathian thawi hmunkhat ih a rak um ciami tongkam (Jn 1:1) Pathian in lei le van a sersiamnak tongkam (Gen 1:1) cui tongkam cu Pathian asi (Jn 1: ). Cui tongkam cu minung sinak a lak ruangah minung khal a si ih Jesuh tin kan ko.

Ziangkim tithei Pathian in tidai ihsin sabitti ih a canter cu mangbang ding a um lo. Zianghman umlo hman in lei le van a sersiam.

A sinan sabitti cu ka thisen a si (Mt 26:28.Mk 14:24, Lk 22:20) a ti lala tikah milai rundamnak hrangih a mah le mah sumnak a peknak pawl thawn a vun peh aw ter thluh.

Curungah Jesuh ih Canan khua nupithitnak ih a tuah mi mangbangza thawng in Jesuh ih Pathian sinak cu pholang a siih hleiah milai tlaksiatnak ihsin a thihnak lw thawhsalnak tiang a huap thluh ruangah rundamnak thuanthu thawi famkim asi.