Mithianghlim Hilary
(315-367) January-13
Kumzabi palil ih hminthang zet mi mifim Mithianghlim Hilary cu milian sungkua in kum 315 ah France ram, Poitiers ah a rak suak. A mah cu milem zuk tuh biaknak in a rak thanglian ih innsang a nei ih Abra ti mi fa pakhat a nei.
A kum sawmthum ah Pathian tampi biaknak ih a that lo zia a hmuh hnu in ziang hmuahmuah cu sersiamtu Pathian pakhat lawng a um thu a rak hmu suak.
Netabik ah cun daan hman pawl Christian Bible Cathianghlim ih a hawl mi thudik a hmuh hnu ah a nunnak a rak thleng ih tikholh nak a rak ngah.
Mitampi in Mithianghlim Hilary cu mi menmen a si nan Poitiers khuapi ih Bishop ah an rak duh. Cui sinak hrial ding a zuam nan tangdor nak cu Bishop ih nuncan thawn a kaih thu minung tampi ih an zum nak ah a rak cang.
Kum 353 ah Bishop cannak a ngah hnu ah a nupi le a fate pawl thawn um tlang lo dingah tha ten a rak sim. Mithianghlim Hilary in “Bawi Jesuh cu Pathian a si lo” ti mi ruahnak kha dodal in a rak tong ruangah Rome Siangpahrang Constantus in kum 356 ah an ram in a rak dawi.
Ram dawi a rak tuar lai ah Bawipathum Pathian thawn pehpar mi ca uk a rak ngan. Kum 361 ah Poitiers ah a feh sal ih kum 367 tiang Catholic pawlpi ih zumnak a rak humhim.
Mithianghlim Hilary cu nunnem mi a si ih mi tinkim tha zet ih a rak kawm ko nain Pawlpi a dodal tu pawl khal a rak dodal ve.
Mithianghlim Hilary cu Pathian fate pawl biaknak ih a that lo zia a hmu fiang tu a si vek in kan nih khawl kan nunram ah Pathian a hawl hmu tu kan si thei nak dingah zuam tlang uh si.
