Mithianghlim zate ih Puai ni sunglawi (November-1)

          Mithianghlim pawl cu Paradise kumkhua nunnuam nak hmun ih nuam aw tu pawl an si. An mah pawl sungin mi hrekkhat cu Pawlpi ih mipi theih ih nemhnget mi an si ko nain, a tamsawn cu Pathian pakhat lawngin a thei.

          Thuphuan 22:5 ah “Hmaiton in an hmu aw dingih an hmin cu an cal ah ngan a si ding” tiih a ti vek in an mah cu Pathian ih Vancunram nuam ah Pathian hmaiton ih a hmufiang tu pawl an si.

          An mah pawl sungin a hminthang bik mi cu Vancungmi pawl ih Siangpahrang Bawinu ih upat sunloih mi a thianghlim zet mi Fala Thianghlim Nu Maria a si.

          Kan zate khal Vancungmi ih cang dingah sawm mi kan si. Hrekkhat cu Pathian hrangih thah tuarnak thawngin siseh, mi hrek cu zohthim tlak zet mi ih hminthang zet mi nuntuzia, ruah daan pawl thawn a nung tu pawl an si. A tang lai mi hrekkhat cu an mai nitin tuanvo pawl an ti thei tawkin a tha bik si dingih silhkhah nakin siseh, Mithianghlim pawl si dingih kawh mi an si.

          An mah pawl cu hi leitlun an nun lai ah hin an mai duh nak hnak in Pathian duhnak a hawl tu pawl an si. Tuini ah Mithianghlim pawl ih puai ni ah kan theih ban lo mi Mithianghlim pawl a hleice in, mang in sunloihnak ni khal a si. Vancungram a thleng zo tu Mithianghlim pawl vekin kan nih khal kan thlen ve thei nak dingah zuam tlangin, kanmai kan lak cio mi kan Mithianghlim pawl hnen ah bawmnak zangfah nak dil tlang uh si.