Vargen tawpir pakhat cu a um nak tikhur pakhat ih si tiva khatlam ih a um mi a dang tikhur pakhat ah a feh duh. Asinan Varngentawpir (kimikoh) te cu ti a leuh thiam lo ruangah tiva tan ding kha a har.

         Tiva kap ih a feh laiah hi tiva cu ziangtin ka tam ding ti a ruah rero laiah rinlopi ah tikap ih butlak a hring yawng pakhat kha a hmuih a va biak.

         “Ka  rual butlak keimah kha na zang parah in re awla tiva khatlam ah in feh pi aw. Ka lungawi nak ka hnilh lo ding” a ti.  

         “Ziang tin si thei ding ka lo pawk phah ihsin na tuai in in sun a si le ti ah ka pil that ding a si si”

         Varngen tawpir (Kimikoh) cun “Ka rual butlak ka tuai thawn ka lo dawt ding maw si. Tiva khatlam ih in ret tu cu cuitin ka lo tuah ngam ding maw si. Theh in ka hau thawn ka lo keu ruangih ti ih na pil a si le kei khal ti ah ka pil that ding a si si. Ti ka leuh thiam lo ti khal na thei a sisi.

         Butlak khal a ruat. Kimikoh a sim mi khal a hman. A mah le mah ti pil ih thih ding in a hau thawn in keu nak san a um lo. Cutikah butlak khal tiva khat lam ih phur ding a lung a kim.

         Cutikah butlak cun kimikoh (Varngen tawpir) kha a zang parah a kai ter ih ti tha a pin zet mi tiva ah a ruang kha ti par ih lang ding in a zuam ih tiva a tan.

         Tiva a lai an thlen tikah butlak khal a zang ah thil keu mi vek ih a thei ih a dung a zoh tikah (Varngen tawpir) kimikoh cun a hau kha a zang ih si a phoi lai a hmu.

         Butlak khal naa tuar phah in a sim.“Ha…Ziangtin saw na ti. Nangmah in tuan ah in sim kha. Na hau thawn keu lo ding in. Tuah cun na tuai ka kai zo. Ti pil ih ka thih le nang khal tiih pil ding na tih lo maw si”

         Varngen tawpir (Kimikoh) khal in ziang a ti ti le “Na thih a si le kei khal ka thi ding ka thei. Asinan a dang ramsa pakhat kha ka tong a si le ka hau thawn keu ding keimah ih ka mizia kha ka hlon thei lo”  a ti.

         Netabikah cun butlak khal kimikoh khal an pahnih in tiva sungah an pil ih an thi.

         Hi thuamthu cu ramdangih a thang zet thuamthu a si. Nauhak nom nak ih thuanthu a si lo. Minung pawl ih an nuncan thawn a pehpar aw mi mi upa pawl theih ter nak a pek mi thuanthu a si.

         A zangfah ih a bawm ko nan cuti vekin mizia hlon a theih lo mi minung thawn hmuh awk a si le a bawm tu khal harsat nak a thlen thei ti mi kha theih ter nak pek mi a si.i.