Pope Francis ih capi pakhat asimi Laudato si sirhsan in ca tiin hmin pek mi flim cu November 10, 2022 ah UN ih nikhua thlengnak thurelkhawmnak ah an tarlang. Cui thurelkhawmnak cu November 6-18 tiang Ezipt ram, Sharm el-Sheikh ah an rak tuah. UN ih pawlkom sungtel ram pawl an tel ih Paris thurelkhamnak ih lungkimnak ih thuluu ngah dingah an rel khawm ding. Kan dung kum Glasgow ih tuah mi (COP26) thurelkhawm nak ah an rel bet. Himi thurelkhawmnak ah Pope Francis in leilungpi kilkhawi dingih forhfialnak an rel sal. Thurelkhawmnak cu nikhua thleng nak le thil ci pawl an siat nak khal an rel tlang.
Thurelkhawmnak ah mi farah ram pawl cu ram lian pawl hnakin harsat nak an tuar tam thu, zumnak le science lam ziangtin talhton ding timi, kiangkap siatnak cu Catholic pakhat ih hmuhnak in rel fel ter dingah an relkhawm. Thuhla tampi nei mi minung pawl thawn biakawknak a bang aw mi thuhla a lang ter. Curuangah kan zaten hmunkhat ah tuan tlang ding a si thu, a tu-ah lungrualnak ti tikah leilungpi kilkhawinak, a hlo rero mi cii a phunphun pawl kilkhawinak, mah le mah kilkhawinak, kan fa le pawl kilkhawinak a si thu Pope in a sim.
Flim an tarlan hlan ah Izipt ram hrang Pope aiawhtu Archbishop Nicolas Henry Marie Thevenin in Francescan pawlkom aiawhtu Fr.Angel Cortez, OFM thawn khal siseh, a dang thurelkhawmnak ih tel tu Catholic pawlpi ih aiawhtu pawl thawn an tong aw. Tuikum flim cu himi thurelkhawmnak ih tel tu aiawhtu pawl hnen datsi, dissel tivek ihsin suak mi thil sia pawl mal dingah tuanvo laknak dil nak pawl theih asi ding thu Archbishop in a sim.
Pope in kiangkap siatnak cu leitlun ih mi tinkim thawn a pehpar thu thei dingah 2015 ah a rak ngan. HImi capi cauk thawn suah asinan capi ih forhfial mi pawl ziang rel lo vekih um mi dram pawl Senegal, the Amazon, India le Hawai ram pawl sawm in mi harsa pawl mino pawl hnen ti daan dingn lam an hmuh ter. Laudato Si tuanvo nei tu Lorna Gold in nan hmuh asile hmu lo vekin um a ngah lo thu a sim.
Himi flim cu Oscar laksawng ngah tu in a zuk ih social ah October 4 St. Francis Assissi puai ni ah an tarlang. Pope dinhmun khalin kiangkap kilkhawinak lungkimnak ih a tel ni khal a si. Himi flim ih a rah suak ruangah mi harsa pawl, cuihmunih um mi mipi pawl, mino pawl, ramnung pawl ih aw pawl cu flim a zoh tu apwl hnen a thleng ding. Tuitum thurelkhawmnak ih a tel tu ram pawl ih cozah hnen kiangkap kilkhawinak cu kiangkap ih thil tha lo cannak kham thei dingah le hmunkhat ten tuan dingah a tul zet thu a theih ter.
Himi thuthang cu RVA thuthang ihsin kan don mi a si.
