November 17

Hungary ram kilkhawitu Mithianghlim Elizabeth cu Pressburg khuapi ah 1207 ah a rak suak. A mah cu a pahnih nak Siangpahrang Andrew ih fanu a si.

A nauhak lai te in Thuringia khuapi Ludwig thawn an rak thit aw ih fate pathum an rak nei. A mah ih iang neih nak le a thianhlim nak in a pasal a rak kai hruai thei.

A pasal in a khualtlawn nak ih a tlun tinten a mai hrangah laksawng a sum theu vek in a mah thlah phoh ding hnak in tlang vek ih a sang mi sui le sui tlang hman ka thlahphoih thei ding tiah a rak sim theu.

Cui hnu kum rei lo te ah Louis cu Crusade raldo dingah tangphawlawng thawn a feh ih Otranto ah Plague nat nak thawn a rak thi.

A ruak cu Germany ah an keng sal tikah Elizabeth cun tap phah in “Leilungpi le a nuam nak zaten ka hrangah a thi zo,” tiin tap phah in a rak sim. Cui rei lo te ah Farnciscan a pathum nak daanthlunnak pawlkom ah a lut ih ziangtik hmanih kut sih nawn lo dingah a rak botcat.

Elizabeth in a mai netabik kum pawl cu a mai rak din mi Marburg sizung ah mina pawl tuamhlawm phah in kum reipi mifarah pawl bom nak thawn a rak hmang.

Elizabeth cu a kkum 24 a ti kum, 1230 ah a rak thi. A mai thlarau lawm thawn pehpar mi Puithiam in “A mah cu mina pawl le mifarah pawl hrangah that ho zet ih a tuan tiang a mah hnak in ruah nak hmuanhmuan hunkhat ah kom in Pathian thu ruat thei tu nunau ka hmu,” tiah lungkim in a rak ti.

Mithianghlim Elizabeth cu mifarah, mi harsa pawl bomnak hrangah a khulfung dah lo tu le Pathian thu ruah nak ah thiam zet tu a si vekin kan nih khal kan kiangkap ih um mina pawl mi harsa pawl zoh tha thiam in le kan thinlung tak ten Pathian thu kan ruah thei nak dingah thla in cam sak aw tiin thlaza cam tlang uh si.

Mithianghlim Elizabeth kan mah hrangah thla in cam sak aw. Amen.

Leave a Reply

Your email address will not be published. Required fields are marked *