RVA Falam Service/ November 7, 2026
Uruguay ram ih tuah mi prayer Vigil thlacamnak ah Pope Leo XIV in zumtu mipi pawl hnen a menmen mi dinhmun lawngah lungkim men lo in mah le mah Pathian hnen ap aw dingah a rak forh fial.
Biaknak lam ah ziangsiar lo nak pawl a tam lai caan ah thianhlimnak lamzin kha cohlangin hmang dingah le mai zumnak kha famkim ten nunpi dingah tha a rak pe.
Khrih in kan hnenah a thar mi nunram thawn famkim in a khat mi nunram ah sawm kan si thu khal ralrinnak a rak pek.
Khrih ih lungawinak pakhat lawngin kan thinlung kha a ngaingai in a famkim ter thei thu pehbet in a rak sim.
Curuangah tu le tu thlacamnak, Missa sumnakih tel nak, sual thlahnak sannak le Cathianghlim siarnak ihsin Khrih kha mai nunram ih a laifannak ah ret dingah a rak forhfial.
Cuitlunah mino pawl hnen innsangdin thu le innsang nunram kha raltha zetin cohlangin din dingah a rak forfial ih innsang nei zo tu pawl khal fale pawl ti mi Pathian ih laksawng kha lungawi ten cohlang dingah tha a rak pe.Puithiam dinhmun le mai nunram a hleice in a ap awtu Consecrated Life nunramah kawhnak a ngah tu pawl khal raltha zetin cohlangin tuan dingah a rak sawm.
“Thianhlimnak ih thleng dingah ruahsan in zuamnak kha tih hlah uh” tiah a rak sim.
Khrih ih famkimnak a neitu kan si ruangah a menmen mi dinhmunah lungkim in um men lo ding khal ah ralrinnak a rak pe.
Leilungpi kha than dingah teti khan tu a tul ruangah Pope in thupit in a rak sim.
Jesuh Khrih cu Pathianih fapa a si ih Pathian cu kan mah thawn a um thu kha leitlun mi hnen tettikhan dingah a rak forhfial.
Source- Vatican news
