October-9

          Propaganda fidei pawlkom rak dintu Mithianghlim John Lionardi cu kum 1541 ah Italy ram, Lucca khuapi ah a rak suak. A kum 23 ah Puithiam a cang ih a nunnak cu mino pawl Pathian thu zirh nak ah a rak ap.

          A zuam zet tu dungthluntu si nak in mino mipa tampi Puithiam cang dingin an rak hruai thei. Kum 1574 ah “Pathian Nu ih tlamtling zet mi Puithiam tlawng” a rak din ih a tlawngta pawl Pathian hnatuan nak ah a rak ap.

          Rome khua ih ramdang dang ih Pathian hnatuan tu pawl hrangah Puithiam cang thei nak tlawng khal le a rak sak. Cui tlawng cu Pope Moukooban a pariat nak in “Propaganda fedei college” hmin in a rak nemhnget.

          Mithianghlim John Lionardi cu midam lo pawl a zoh nak in nat a ngah ih cui nat nak in 1609 kum ah a nunnak a rak cem.

          St. Lionardi cu pawlpi hrangah nasa zet in hna a rak tuan tu a si. Harsat nak phunkim lak ah beidong men lo in a nunnak cem tiang a rak tuan thei. A mai nunnak hman ruat lo in midang that nak le dam nak ding hrangih zuam tu a si vek in a nunnak rak sung tu khal a si.

 Khrih hrangah ram dang dang ih Pathian hnatuan thei ding khal ah nasa zet in a rak zuam tu a si vek in kan nih khal kan nunnak hi midang hrangih a hmang thei tu kan si ve nak dingah Pathian hnen zaangfah dil phah in zuam tlang uh si.