Pope Leo in zarhtin mipi a tonnak ah a veihnihnak Vatican council ih Pawlpi ukawknak thawn pehpar mi daan hrampi a si mi Gaudium et spes ih a hmailam a khanpi 4 kha pehbet in fiangten a rak sim.
Pope in tuisun leilungpi ih a hmaisabik mission cu minung pawl hnen nunram ih a thuk mi thusuhnak pawl kha thaten ruat thei dingah bomnak a si thu a rak sim.Cui thusuhnak pawl ah kanmah cu khuitawk hmun in kan suak? Khuiah kan feh ding? Duhdawtnak ih a sullam cu ziangso a si ti mi pawl an tel.
Cui mission thawn a ral aw mi in santhar mino pawlkom ah minung lam ih mawinak lam le in einak lam le ramcang dingih umnak a tamtuk thu Pope in ralrinnak a rak pe. Cumi ai ah “kan thinlung cu tlun lam ah ruahsan dingah sersiam mi kan si” tiah a rak sim.
Pawlpi cu leitlun ih minung pawlkom pawl dinnak khal ah mission kha khahsilh ding a si. A sinan cu mi cu ramkhel hnatuannak pawl ihsin thupi bik ih tuah a silo ih zumnak le duhdawtnak kha tetti khannak, dingthluk lairelnak, le unau suak khat hrang zuamnak in tuah a si tiah Pope in a rak sim.
Pawlpi dinhmun in thana utu pawl le farah harsa pawl namneh nak kha cohlan a thei lo vekin mi ringih umnak le thudik lo pawl cangter mi a dik lo mi pawlkom pawl khal cohlan lo a sithu a rak sim.
Pawlpi ih zirhnak pawl in lamhmuh a si ih Christian pawl cu mi hrang thatnak hawlnak ah thinlung tha neitu pawl zate thawn kop in tuah tlang ding a si.
Pope Leo XIV in Christian pawl dinhmun in mai nitin nunram kha zumnak thawn kaihaw in nung dingah a tul thu thupit in a rak sim. Gaudium et spes ah a sim vekin mai zumnak thu langter in simnak le nitin nunram ah a ngaingai ih nunnak karlak ah a thlauawk nak cu tui kan san ih a nasa zet mi a sual pawl sungin pakhat a si tiah a rak sim.
Cuihlei ah Gaudium et spes cu mipi pawl ih mission khal thupit in a lang ter thu Pope in a rak sim. Kawhhran mipi pawl cu Gospel thuthangtha ih manhlat zia pawl kha mai innsang le hnatuannak lawng silo in nunram ih hmun dangah telh in nung dingah kawh kan si.
Pathian ih miphun zaten a hleice in Pawlpi kaihruai tu pawl le biaknak lam ih fimthiamnak sang tu pawl cu tuisan ih nunphung pawl kha Pathian ih ttongkam le Pawlpi ih tuah theu daan lamhmuhnak in ruat thiam dingah kawh nak a ngah tu pawl an sit hu Pope in a rak sim.
Hi ti vekih tuah dingah nunphung ih santiluan pawl ih khuhnak in luat in a bangran mi thinlung nei dingah a tul. Cu rualrual in leilungpi kha a tha zawngin hmuh theih a si ko nan Gospel thuthang malter lo in rinum zetin langter a theih ding tiah a rak sim.
Netabikah Pope in Pawlpi ih tumtah mi pakhat cu Pathian ih ram kha cangternak le minung phun zaten ruundamnak hna kha tuan dingah a thupit thu a rak sim. Cui mission kha a thupi bikin mai thianhlimnak le unau suak khat duhdawtnak in cangsuak ter dinga si.
“curuangah thianhlimnak le duhdawtnak ah nung thei dingah leilungpi cu zumkha zumin ruahsah thei dingah Thiangthlarau Pathian ih hnatuannak kha on sak in cohlang tlang uh si” tiah Pope Leo XIV in a rak sim.
Hi mi thuthang cu Vatican thuthangin kan ngan mi a si.
October 7, 2026
Crd: Vatican News
