Pope Leo in Palm Sunday ni Missa raithawinak ih thu a simnak ah “raldonak tuah tu pawl ih thlacamnak, Jesuh in a ngai sak lo” tiah sim. (March 29, 2026)

Pope Leo XIV in Palm Sunday ni Bawipai zonzaih a tuar thoknak Missa hoha in a tuahnak ah ralbuainak a hrial ih remdaihnak ih Siangpahrang a si mi Jesuh Khrih thu kha ruatsal in a sim. Cuihlei ah raldonak a tuah rero tu pawl ih thlacamnak a ngaisak lo tu Siangpahrang a si thu khal langsar in a rak sim.

Pope Leo XIV in Palm Sunday ni “Bawipai zonziah tuarnak a thawhnak ni” ah St. Peter tualrawn ih a ra khawmtu zumtu pawl hrangah Missa raithawinak hoha in a tuah. Athuthangtha simnak sungah Pope in Jesuh cu a kiangkap ah tuahmawhnak pawl a rak cang ko nan a mah cu remdaihnak ih Siangpahrang a si thu ruat in a rak sim.

Jesuh Khrih cu Thianglamtah ( harsatnak) lamzin a rak zawh vekin kan ni khal a mah thawn feh tlangin minung zate hrangah duhdawtnak laksawng ih a rak ruah mi zonzaih harsatnak kha ruat phah in a rak sim.

Pope Leo XIV in midang pawl in donak pawl tuah dingih an thangphok lai khal ah a nih in thinnemnak thawn in zoh ringring asi. Midang pawl in Nam le funghreu pawl hawi in an um lai khal ah minung zaten kha duhdawtnak thawn cohlang in pom dingah a mah le a mah a rak ap aw.

Jesuh Khrih cu khua thim le thihnak in a mah khuh dingih an um lai caan khal ah leilungpi ah nunnak le tleunak keng dingah a rak ra tiah Pope Leo in pehbet in a rak sim.

Remnak Siangpahrang” ti mi ttongfang kha tuletu a hmang ih Pope Leo XIV in Jesus Khrih ih zonziah harsatnak sungih a rak tuah mi pawl kha lamhmuh in a rak sim ih cui a tuah mi pawl in remdaihnak kha a keng duh mi duhsaknak kha tetti ah alang thu fiangzet in arak sim.

A dungthlun tu pakhat in Puithiam sang pakhat ih sungkhat pa ih hna a sah thlak tikah Jesuh Khrih in cui a dungthlun tu kha Nam kha a kawm sungah ret dingah thu a rak pe ih “Nam thawn a nungtu cu Nam in a siatsuah leh ding” tiah mangsal in a rak sim.

Jesuh Khrih cu Thinglamtah par an tar ih thihnak ih an thlen pi tik khal ah amah le amah hriamnam a rak kaih lo vekin a mah le a mah khal a rak hum aw lo. Amah le amah thah tuar dingah Tuu note vekin hruai a si vekin daite in a rak thlun ih a rak tuar.

Pope Leo in “Bawipa cu donak kha ziang tik lai khal ah a el mi Pathian ih a nunnem mi mithmai a neih thu khal a rak lang ter. A mah le mah ruunawk hnak in minung thuanthu ih a tik cu le a hmun phunphun ih minung pawl ih Thinglamtah harsatnak zate cohlang dingin a rak pom vekin a mah le a mah khal Thinglamtah parah tar dingah a rak pe aw” tiah a rak sim.

Pope in Prophet Isaiah ih ttong mi khal kahtlang in a rak sim ih “nan nih cu thlacamnak tampi nan tuah ko nan, ka rak ngai lo, nan kut pawl cu thisen in a khat thluh” (Is 1:15) “Jesuh Khrih cu raldo a hrial tu remdaihnak ih Siangpahrang a si ih zokhal in raldonak cu a dik tiah an ti thei lo” tiah Pope in a rak sim. Raldo nak a tuahtu pawl ih thlacamnak pawl khal ngai lo in a hnong a si” ti khal in a rak sim.

Pope in tui ni leitlun pi ih minung sungrual pawl ih hriamhma pawl kha riahsia zetin a rak lang ter ih, minung pawl cu “ donak ruangah hmuhsuam a tuartu pawl le ral ih thah a tuartu (siatsuah tuartu) pawl ih aunak aw pawl” in Pathian hnen ah an au thu a rak sim.

Remdaihnak ih Siangpahrang asi mi Jesuh Khrih cu a mai thinglamtah ihsin a rung au sal, Pathian cu duhdawtnak a si, zaangfah nak nei aw, nan hriamhrei pawl kha thlah uh law, nan u le nan nau kha vunmang sal uh law” tiah Pope in a rak sim.

Anetnak ah Pope Leo XIV in Tonino Bello (Pathian ih sal ih khawh a si mi Bishop) ih tong pawl kha sawhkhih in a rak sim ih a mai fapa ih thinglamtah hnuai ih a ding tu Bawinu Mary thu kha ruat in a rak sim.

Pope in Bawinu Maria hnenah a rak ap ih minung pawl ih dik lo zet ih an tuah mi pawl khal cem hram seh, ralbuainak khal mal vivo hram seh, ral ruangih harsatnak pawl khal um nawn hram hlah seh, tuahmawhawk nak le natnak pawl ruangih mitthli a tla tu pawl zate ih mitthli pawl khal thal ni sa ah vur pawl khal an zup vekin zamrangten hul in hlo hram seh” tiah a rak ap. Hi mi thuthang cu Vatican thuthangin kan a tawizawng le a remcang thei bikin kan ngan mi asi.