Pawlpi in Bawithumkom a zumnak cu ziangtin a lang ter?

Pawlpi in Bawithumkom a zumnak cu: Pa, Fapa le Thiang Thlarau cu pathum an si nan Pathian pakhat lawng a si (Pathian an sinak ah pakhat), timi zumnak in a lang ter a si. Bawithum an si nan Pathian pakhat lawng a um. Ziangruangah tile an zaten Pathian sinak cu famkim ten an co thlang thluh. Pakhat le pakhat an pehtlaih awknak ah lamdannak a um. Fapa cu Pa ih hnen ihsin a raih Thiang Thlarau cu Pa le Fapa hnen ihsin a ra.

• Bawithum in ziang tin hna an ṭuan?

Pa, Fapa le Thiang Thlarau cu Bawithum an sinak ah ṭhenṭhek a thei lo vekin an hnaṭuannak khal ṭhenṭhek a theih lo. Bawithumkom in hnaṭuan pakhat lawng a si. Hi Pathian hnaṭuan nakah an zaten, Bawi Thumkom ih an sinak vek in, mah le ṭuanvo ciar in an tel thluh a si.

• Pathian a cak a si, kan timi cu ziang ti can so a si?

Pathian in amah le amah “micak ka si” (Psalm 24:8); “ka hrangah thilcang thei lo mi ziang hman a um lo” (Luka 1:37), tiah a ti. Pathian ih thilti theinak cu mangbangza a si. Zianghman a um hrih lonak ihsin leilung a sersiamnak in siseh duhdawtnak ruangih milai a sersiamnak in siseh Pathian ih cahnak cu a lang a si. A hleice in Fapa ih milai cannak le thawhsalnak, leitlun mi pawl a fa le pawlih a can ternak le an sualnak a ngaidamnak ihsin Pathian ih thilti theinak le cahnak cu fiang te in kan hmun thei a si. Cu ruangah Pawlpi in Pathian cu ‘cahnak le kumkhua ih a nung mi Pathian’ tiah a ko a si.

• “A thok ihsin Pathian in lei le van a sersiam a si” (Seemtirnak 1:1), timi zumhnget hi ziang ruangah a thupi?

Sersiamnak cu Pathian in rundamnak hrangih a tumtah mi hrampi a si. Curuangah Pathian in “lei le van a sersiam a si”, timi zum hi a thupi zet. Sersiamnak in Pathian ih cahnak le duhdawtnak khal a lang ter. Sersiamnak cu Pathian le minung lak ih thukam can ternak hmaihruai khal a si. Rundamnak ih hramthoknak khal a si. Cuih hlei ah, milai ih kan hramthoknak le tumtahnak khal in sim a si.

• Leilungpi cu zo in a sersiam?

Leilungpi cu Pa Pathian in a sersiam a si, tiah Pa Pathian ih hnaṭuan lawng khih hmuh a si ṭheu. Asinan Pa, Fapa le Thiang Thlarau an pathum in leilungpi cu an sersiam a si.

• Leilungpi cu ziang ruangah sersiam a si?

Pathian ih sunlawinak ding hrangah leilungpi cu sersiam a si. Leilungpi sersiamnak in Pathian in a maih ṭhatnak, mawinak le diknak a langter. A thupibik in leilungpi sersiam a sinak san cu Khrih sungah Pathian cu “ziang kim” (1Corintians 15:28) a si theinak ding, a sunlawi theinak ding le milai kan nomnak ding hrangah a si. “Milai nunnak cu Pathian ih sunlawinak a si; milai ih nunnak cu Pathian ih sunmang a si” (Saint Irenaeus).

• Pathian in ziangtin lei le van a sersiam?

Pathian in lei le van cu fimthiamnak le duhdawtnak thawn a sersiam a si. Lei le van cu a ṭul ruangah Pathian in a sersiam a si lo. Pathian in “ziang hman loin” ihsin (2 Maccabees 7:28) leilung a sersiam a si. Pathian in leilungpi cu a Fapa le Thiang Thlarau in a kilkawi.

• Pathian kilvennak kan timi cu ziang a si?

Pathian kilvennak kan timi cu Pathian in a sersiam mi pawl a tumtahnak thleng ter dingih lam a hruainak a si. Pathian cu a tumtah mi ṭuan suaknak dingah Saya a si. Asinan, a sersiam mi pawl ih ṭuanpi ding a duh. Curuangah Pathian in milai pawl hnenah an mah te ṭuantheinak huham thlawhsuah a pek.

• Ziangtin Pathian kilvennak thawn hna kan ṭuan tlang ding?

Pathian in kan zalennak a upat a si. Asinan, amah thawn ṭuan tlang dingin in sawmih thlacamnak, ṭuannak le tuarnak thawn ṭuan thei dingin thazang cahnak le thilti theinak in pe a si. “Amaih hrangih hnaṭuan duhnak thinlung” (Filipi 2:13) khal in pe a si.

Pathian cu ziangkim tuah thei tu le kilkhawi tu a si le ziang ruangah ṭhatlonak a um thei?

Himi thusuh mi cu Khristian zumnak lawngin kan let thei a si. Pathian cu ziang ti khal in ṭhatlonak cang tertu a si lo. Pathian in ṭhat lonak siatbal dingin thihnak ihsin a thosal mi a Fapa hnenah ṭhat lonak hmuahhmuah ih hrampi a si mi milai sualnak ih mangbangza thu fiangten a lang ter.

Ziangruangah Pathian in ṭhatlonak can a on?

Zumnak in hi tin fiangten in sim: ṭhatlonak ihsin ṭhatnak suak ter lo sehla Pathian in ziangtik hmanah ṭhatlonak cangter dingin a on lo ding. Hithu cu Pathian in mangbangza in Khrih ih thihnak le thawhsalnak ah a langter a si. Fiangtein kan sim a si le, ṭhatlonak hmuahhmuah lak ih a tumbik mi ṭhatlonak (a Fapa an thahnak) ihsin ṭhatnak hmuahhmuah lak ih a tumbik mi ṭhatnak a si mi (Khrih ih sunlawinak le milai tlennak) a cang ter a si.

Catechism of theCatholic Church (no. 48-58)