Pope in Lazarus vekin a thar mi nunnak ah Bawipai kawhnak aw ngai thei hram uh si tiah sim.(March 22, 2026)
Zarhpi ni Angelus thlacamnak ah Pope Leo XIV in Lazarus ih a thawhsalnak Cathianghlim sungta an rak ruat khawm ih cu mi cu a famkim mi nunnak ah in sawm tiah a rak sim. Cuihlei ah Pathian ih zaangfah lainatnak in a thar in thlengaw in duhdawtnak ih tleunak sungah feh dingah le a cemthei lo mi duhdawt lainatnak kha langter dingah in sawm thu khal sawhkhih in a rak sim.
Ulhcan a vei ngannak Zarhpi ni St.Peter tualrawn ah Angelus thlacamnak dingih a ratu mikhual pawl le zumtu pawl hnen cibai a buknak laiah Pope Leo XIV in Lazarus kha Bawipa in nunnak a pek sal thu a rak sim.
Pope in hi thilcang cu “Khrih ih thihnak parih a neh theinak le Baptism thawngin kan ngah mi kumkhua nunnak ih laksawng kha a langter I hmuhnak pakhat khal a si” tiah thupit in a rak sim.
Pope Leo XIV ih a rak ruah mi ah Jesuh cu Martha of Bethany hnen ih a sim vekin kan ni khal tui ni ah in sim a si. Keimah cu thosalnak le nunnak ka si. keimah I zumtu cu thi hman sehla an nungsal ding. Nunnak thawn I zumtu hmuah in ziangtik hman ah an thi nawn lo ding” tiah sawhkhih in a rak sim.
Pope Leo XIV in tuini ih cathianghlim siarnak cu thianghlim zarh hlan ah siar a si thu a rak sim. Cuitik cu caan ah kan mah pawl cu Khrih ih harsat tuarnak lam zin pawl, Jerusalem khuapi ih a luhnak, netabik zaanriah ei nak, kekholhnak, Thinglamtah par ih a thihnak le an phumnak pawl thu ruah sal a si. Hitivekin kan mah pawl cu kan mah le kanmah kan timtuah aw thei ih hi thilcang pawl ih duhsan le a man hlatzia pawl kan thei thei vekin cu mi pawl ih in pek mi thlawsuah pawl khal ngah dingah kan thinlung kan on thei ding thu a rak sim.
Hi mi thilcang pawl cu thihnak kha neh in Baptisam sannak in kan sungah a um mi a nung mi Bawipa cu Khrih ah a famkim ih kan ruundamnak le a famkim mi nunnak ah a si” tiah Pope Leo XIV in a rak sim.
Pope Leo XIV in Pathian ih thawhsuah cu leilungpi kha tleunak a pek thu a rak sim. A sinan minung pawl cu veikhatkhat ah mah kha nuamnak a pe thei lo mi thil pawl hawl phah in lamzin kan sual theu a si tiah a rak sim. Cui mi ah a thar a thar mi kha hawl ringringnak, tikcucaan, a man le midang parih ngaihsaknak pawl kha a mal ter thei mi thil pawl an tel. hminthannak, thilri pawl, nuamnak pawl le a laangte ih pehtlaihawknak pawl in kan thinlungah a khat ter thei vekin cumi lawng si lo in thih thei lo ding khal in a tuah thei lo” ti khal in telh in a rak sim.
Kan mah pawl cu “mi a siatsuah ter thei mi thinlung” kha kan thinlung sungah kan keng ih cu mi ih a tul mi a laangte ih a ra mi in a khah ter thei lo” tiah Pope Leo in ngamhnget in a rak sim. Cuihlei ah Augustine of Hippo in “kan mah pawl cu Pathian hrangih tuah mi kan si ih a mai sung lawngih kan colh laihlan lo remdaihnak kan hmu thei lo asi” tiah kahtlang in a rak sim.
A cemnak ah Pope Leo XIV in Lazarus ih a thosalnak thu cu thiangthlarau ih bomnak le thazang in “kan thinlung kha mai hrang lawng ruahnak, thilri ruahnak, tuahmawhnak le a lenglam runram ih kan ngah mi nunsimnak thawn hi ziaza pawl in luat dingah a rak sawm” tiah a fak forhfial.
Cu mi pawl cu Lungtum pi vekin kan mah pawl cu mai hlawknak lawng a zoh mi “Thlan” sungah khum aw vek ah a can ter thu khal sawhkhih in a rak sim.
Angelus thlacam an thawhhlan ah Pope Leo XIV in Virgin Mary ih bomnak dil dingah a rak sawm. “Hi thianghlim zarh pawl ah a mah ih zumnak, a rinsannak le rinumnak thawn nung thei dingah le a mai fapa thawn tonawk nak ih hmuhton mi kha kan sungah nitin ten a thar in a can thei nak dingah thlacam dingah a rak sawm. Hi mi thuthang cu Vatican thuthang in a remcang thei bik ih kan ngan mi asi.
