March 19
Thianghlim Maria ih innsangpa, Bawi Jesuh kilkhawitu Mithianghlim Joseph cu David ih tefasin a si. Mithianghlim Joseph cu Nazareth khua te ih a um mi inn sak tu a si ih Maria thawn an ham aw mi khal a si.
An mai pupa daan an tuah daan vek in Mithianghlim Joseph cu Maria thawn thiaw dingih hril nak ngah tu a si. Ziangahtile a kianghrol in daidimpar a par ruangah a si.
Maria cu Mithianghlim Joseph thawn an ham awk kum ah fa a vun. Mi tlaitluang zet mi Joseph cu mi tha a si ruangah Mary kha mi hmai ah ningzak ih um ter a duh lo ih an hamawk nak cu a thupte ih phelh saal a tum. Cu mi thu a ruah rero laiah a mang ah Bawipa ih Vancungmi pakhat a hnenah a langih, “Savid tefasin Joseph, Mari hi na nupi ih thit dingah tihhlah. Ziangahtile fa a vun nak hi Thlarau Thianghlim thawng in a si” tiah a ti. Joseph cu a hnung thangih, Bawipa ih Vancungmi ih fial vek in Mari cu a kilkhawi.
Rundamtu Messiah cu Bethlehem khua ih mipum an siar laiah a rak suak. Cu le vun zim tandingih niriat a kim niah mithianghlim Joseph in a fapa cu “Jesuh” tiah hmin a pek. Mifim pathum khal naute biak dingah an feh. Cui mifim pawl an feh hnuah Bawipa ih vancung mi cu Joseph ih mang ah a lang ih, “Tho awla naute le anu thawn Izipt ram ah tlan uh. Kirsal ding ih ka lo sim hlan lo cu tawk ah an um pei” tiah a ti. Hi catlang cu Mt 2: 13 ah kan hmu thei.
A ti bangtuk in Joseph cu a tho ih naute le a nu thawn a zanzan in Izipt ram ah an tlan. Kum tawkfang a rei hnu Herod a thih hnuah Bawipa ih vancungmi cu Joseph ih mangah a langih Nazareth ih kirsal dingin a sim. Mithianhlim Joseph ih kaih hruai nak ruangah Jesuh cu fimthiamnak ah le Lettama innsak daan a rak thiam.
Pawlpi in mithianghlim Joseph cu thih tha ih thih thei nak ding hrangah mi bawmtu tin a rak nemhnget. Ziangahti le amah cu Bawinu Maria le Bawi Jesuh ih bawm nak in a hnget khoh mi zumnak le thinlung nuam te ih a thih ruangah a si. Pawlpi thuanthu ah mithianghlim Joseph cu Bawi Jesuh ih Pathian thu a sim hlan March 19 niah a thih thu kan theithei a si. Pathian ih Bawinu Maria him na kding hrangah mithianghlim Joseph in a nun pumpuluk in a rak ap ruangah a thianghlim mi a nunnak fala Thianghlim nunram rak kilkhawi tu mithianghlim a si.
Leilungtlun huap thawn a pehpar aw mi Pawlpi kilkhawi tu mithianghlim a si tiah an nemhnget a si. A mah hmin a ko ih a rinsan tu pawl zaten a kilkhawi tu mithianghlim khal a si.
Kan nih khal kan nunsung hmuahhmuah ah Mithianghlim Joseph vekin Pathian rinsan in a nung tu kan si thei nak dingah zuam tlang uhsi.
