“Lei le Van Sersiam tu Pathian Ka Zum”
- Ziangruangah dungthluntu pawl ih tuah mi thlacamnak cu “Pathian ka zum” timi in a thok?
Dungthluntu pawl ih tuah mi thlacamnak cu “Pathian ka zum” timi ṭongfang in a thok. Ziangruangah tile “Pathian ka zum” a si timi nemhnget nak hi milai nunnak ah a thupibik mi a si. Cun, milai le leitlun thawn pehpar aw in thudik le thuhman ih suahnak le ratnak hrampi khal a si.
- Ziangruangah Pathian pakhat lawng a um a si, tiah kan phuang?
Ziangruangah Pathian pakhat lawng a um a si kan ti a si le, amah Pathian rori in Israel pawl hnenah hitin a sim: “Aw Israel pawl, ngai uh, kan Bawi Pathian cu pakhat lawng a si” (Daan Peksalnak 6:4). Cun “Pathian dang a um lo” (Isaiah 45:22). Jesuh khal in, “Bawi Pathian pakhat” (Marka 12:29) lawng a um tiah fiangzet in a sim. Cun Jesuh le Thiang Thlarau khal Pathian le Bawi an si. Asinan Pathian pakhat ah ṭhenṭhek awknak ziang hman a um lo.
- Pathian in zianghmin hmangin amah le amah a phuang aw?
Pathian in Moses ih hnenah amah le amah a nungmi Pathian sinak lang ter in hi tin a phuang aw: “Abraham ih Pathian, Isaac ih Pathian, Jacob ih Pathian” (Suahlannak 3:6) ka si, tiah a phuang aw. Moses ih hnenah mangbangza a hmin khal hi tin a sim: “Kei mah cu kei mah ka si”.
Baibal thlun san ihsin Pathian ih hmin cu ‘Bawi’, tiah hman a si. Baibal thar ah Jesuh in amah le amah ‘Bawi’ ka si a ti. Curuangah Jesuh in amah le amah cu Pathian a si ti a lang ter.
- Kumkhua ih a um ringring tu cu Pathian lawng a si maw?
Sersiam mi pohpoh ih sinak le neihmi cu Pathian hnen lawng in a ra mi an si. Curuangah Pathian hnen lawngah ziangkim famkim in a um ih Pathian cu thil hmuahhmuah ih famkimnak a si. Pathian cu thawhnak le cemnak nei lo ih a nung mi a si. Baibal sungah Jesuh in Pathian hmin nei tu a si thu in sim (cf. Johan 8:28).
- Pathian ih hmin phuan hi ziangruangah a thupi?
A maih hmin phuannak in Pathian in mangbangza a si ti thu in sim a si. Pathian lawng caan thawk ihsin caan cem tiang a um. Milai thuanthu le leithlun lan in a um. Lei le van semsiam tu a si. Ziangtik hman ah a thukam a pelh dah lo. A mi pawl run dingin a mi pawl ih kiangah a um. A thianghlimbik a siih “zaangfahnak thawn a khat” (Efesa 2:4). Sual ngaidam dingin a ralring ringring. Cahnak, thiltitheinak le thawm huham thawn a khat ih thudik le duhdawtnak a si. “Pathian cu famkimnak in a khat” tiah mi thianghlim Turibius in a sim.
- Pathian cu ziang tin thudik a si?
Pathian cu Thudik a siih mi a bum thei lo. Cun mi khal in an bum thei lo. Pathian cu “tleunak a siih a sungah thimnak a um lo” (1 Johan 1:5). Pathian in a Fapa cu “Thudik phaung dingin” (Johan 18:37) leitlun ah a thlah.
- Pathian in duhdawtnak a si thu ziangtin in sim?
Pathian in Isarael pawl hnenah nu le pa pawl in an fate parih an neih mi duhdawtnak le nu le pa pawl in an nupi le pasal parih an neih mi duhdawtnak hnak ih tumsawn duhdawtnak ka nei a si, tiah a sim. Pathian ih hnenah duhdawtnak a um (cf. 1 Johan 4:8,16). “Pathian in leitlun a duhdawt tuk ruangah a Fapa neih sun cu leitlun rundamtu dingah a pek” (Johan 3:16-17). A Fapa le Thiang Thlarau a thlahnak ruangin Pathian in duhdawtnak a si thu a lang ter.
- Pathian pakhat lawng ka zum timi cu ziang so a si?
Pathian pakhat lawng ka zum timi in a tanglam ih thu pawl a khih hmuh:
- Pathian ih thawmtumnak le Pathian a sinak thei sinsinnak;
- Ziangtik caan khal ah lungawinak le zumhngetnak thawn nun ringring theinak;
- Leitlun mi pawl pumkhat an sinak le man an neihnak le Pathian hmuihmel kengih sersiam an sinak pawl thei sinsinnak;
- Sersiam mi thilri pawl ṭhatnak hrangih hmannak timi pawl tla an si.
- Khristian zumnak le nunnak ih mangbangza thuthukbik cu ziang a si?
Khristian zumnak le nunnak ih mangbangza thuthukbik cu Bawithumkom Pathian pakhat ih mangbangnak a si. Zumtu pawl cu Pa le Fapa le Thiang Thlarau ih hmin in tihnimnak pek an si.
- Bawithumkom Pathian pakhat ih mangbangnak cu milai ih ruahnak lawngin kan theithei maw?
Pathian in lei le van a sersiam tikah Bawithumkom Pathian pakhat ih thu tawkfang a lang ter. Thianghlim Bawithumkom ih mangbangnak cu milai ih ruahnak lawng in famkim ten kan theithei lo. Hi Bawithumkom ih mangbangza cu Jesuh Khrih in in sim a si. Cun Bawithumkom ih mangbangza cu a dang mangbangza ih suahnak hrampi a si.
- Jesuh Khrih in Pa ih mangbangza thu thawn pehpar aw in ziang in sim?
Pathian cu “Pa” a si tiah Jesuh Khrih in in sim. Ziangruangah tile Pathian in milai le leilungpi a sersiam lawng si loin a Fapa “Pathian sunlawinak ih tleunak le Pathian ih sinak langter tu” (Hebru 1:3) sungih um camcin tu a si ruangah Pathian cu Pa a si.
- Jesuh Khrih ih in sim mi Thiang Thlarau cu zo a si?
Thiang Thlarau cu Thianghlim Bawithumkom lak ah a pathumnak a si. Thiang Thlarau cu Pathian a siih Pa le Fapa thawn an bangrep a si. Thiang Thlarau cu “Pa ih hnen in a ra” (Johan 15:26) ih Bawithumkom ih hram thawknak a si. Thiang Thlarau cu Fapa ih hnen khal in a ra. Pa le minung sinak a la tu Fapa in Thianghlarau cu an thlah ih “thudik zaten thei ding in” (Johan 16:13) Pawlpi cu lamzin a hruai ringring.
