Pope Leo XIV ih Algeria, Cameroon, Angola le Equatorial Guinea nak ding caanserh hman daan ding suah. (March 16, 2026)

Vatican thuthang suahnak zungin Pope Leo XIV ih Algeria, Cameroon, Angola le Equatorial Guinea ih a Tuukhal khual tlawnnak caanserh hman daan ding an suah.

Cui khualtlawnnak cu April 13-23, 2026 tiang a si ding tiah thei a si. 2026 April 13-23 tiang Pope Leo XIV cu Algeria, Cameroon, Angola le Equatorial Guinea ah a Tuukhal khualtlawnnak a nei dingih cu mi cu a mai Pope a tuanthok in Italy lenglam ih a Tuukhal khual tlawnnak a veithumnak a si ding.

2025 kum cem lam ah nisuahnak a laifannak hmun a si mi Turkiye le Lebanon khal a rak tlawng zo ih a ralai ding mi March 28 ah Monaco ah Europe ram lam ah pakhat a um lai hlei ah a tu a khual tlawnnak cu Africa ih ram, ram li ah a feh ding asi.

Tuizarh tlawngkai nikhat ni ah Vatican thuthang zungin Pope Leo ih a khual tlawnnak ding caanserh pawl an rak tarlang.

A cui ni 11 rei a Tuukhal khualtlawnnak ah khuapi 11 ah a feh dingih cibaibuknak ah vei 6 thu a sim ding, thucahnak  vei 10 le Thuthangtha vei 8 simnak a nei ding a si.

Algerian April 13-15 tiang,

Pope Leo XIV ih a Tuukhal khual tlawnnak cu Algeria ram in a thok ding ih April 13 Tlawngkai nikhat ni ah khuapi Algeria ah a theng ding. Algeria ih a thlen hnuah Algeria ram zalennak ruangih ral an buainak hngilh lo nakih sak mi Maqam Schahin Martyrs’ Memorial ah feh in cibaibuknak ah thusimnak caanserh a hmang ding. A cui hngilhlonak lungdawl cu 1982 kum ah Algeria zalennak an ngahnak kum 20 kimnak hngilh lonak ih an tuah mi a si.

Cuihnuah Pope Leo XIV cu minung 120000 hrawng a tlem mi leitllun ih a tumbik Great Mosque of Algiers ah a thleng ding. Cuihnuah a kingah Bab EI Qued khuapi uk sungih um mi Augustinian Missionary Sister pawl ih Welcome and friendship Center ah lennak a nei ding.

Cuini ih netabik caanserh ah Basilica of Our Lady of Africa ah Algeria zumtu pawl thusiamnak a nei ding a si.

Algeria ih a nihnihnak April 14 ni tlawngkai nihnih ni ah Pope Leo XIV cu vanzam thwn nisuahnak saklam tipi kiang khuapi a si mi Annaba ah a feh ding. Cui khuapi cu hlanlai khuapi a si ih Hippo Regius in a thanglian tu Augustine of Hippo ih suahnak hmun khal a si.

Pope cu Archaeological Site of Hippo ah a vehvainak nak a neih hnuah Little Sisters of the Poor pawl ih ih kum upa pawl kilkhawinak inn ah a feh dingih cuihmun ih um tu pawl cibaibuknak a nei ding asi.

Cuihnu Pope Leo XIV cu Order of Saint Augustine pawlkom le Augustinian Community House ah an mai Pawlkom thuthawn tonnak a nei ding. Cuihnuah Basilica of St. Agustine Biakinn pi ah Missa raithawinak a tuah dingih cumi thehah Algiers ah vanzam thawn a kirsal ding asi.

Cameroon: April 15-18

April 15 tlawngkai nithum ah Pope Leo XIV cu Algiers in Yaounde’ah a feh ding. Cameroon ih a thlen hnuah Pope cu Ram President hauhruangah President Paul Biya thawn tonawknak an nei ding.

Cuihnuah Yaoungde Congress Center ah ram ih thuneitu pawl, nunphung pawlkom aiawhtu pawl le rampalai pawl hnen thu cahnak a nei ding.

Cuihnuah Pope Leo XIV cu Ngul Zamba hngaktah umnak hmun ah a feh dingih nauhak paw le riantuan tu pawl cibai buknak a nei dingih cuihnuah Episcopal Conference of Cameroon ih diocesan center ah Cameroon ih Puithiam pawl thawn tonawknak a nei ding. Cuihuah April 16 tlawngkai nili niah Pope Leo cu khuapi Yanounde’ in nitlaknak saklam deuh ih a um mi Bamenda khuapi ah a feh ding. Cuihmun ah St.Joseph’s Cathedral Bamenda ah thu cahnak a nei dingih cuihmun ih mipi pawl thawn remdaih thawn pehpar aw in tonawknak ah a tel ding.

Cuihnu ah Pope Leo XIV cu Bamenda International Airport ah Missa raithawinak a tuah thehhnu ah Yaounde ah a feh sal ding asi. April 17 tlawngkai ninga ni ah Pope cu pehbet in vanzam thawn a feh sal dingih nitlaknak thlanglam kau ih Tipithuanthum kap tluan ih Douala ah a feh ding.

Cuihmun ah Japoma Stadium ah Missa raithawinak a tuah dingih suihnuah St.Paul Catholic Hospital Douala ah vehvainak a nei ding. Cuihnuah Yaounde ah a feh sal ding.

Cui hmun a thlen hnuah Pope Leo XIV cu Catholic University of Central Africa ah Phungsang tlawngta pawl thawn tonnak a nei dingih thucahnak khal a nei ding.

April 18 zarhte ni ah Pope Leo cu Yaounde’-Ville Airport ah Missa raithawinak a tuah theh hnuah a khual tlawnnak hmun dangah a feh sal ding.

Angola: April 18-21

April 18 ah Pope Leo XIV cu Angola ram ih khuapi Luanda ah a thleng ding. Cuihnuah President hauhruangah Angola President Joao Lourenco thawn tonawknak an neih ding, cuihnuah ramih thuneitu pawl, nunphung pawlkom aiawh tu pawl le ram palai pawl tonnak a nei ding. Cuihnuah Angola ih Puithiam pawl tonnak caanserh a hmang ding asi.

April 19 Zarhpi ni ah Pope Leo cu Kilamba ah Missa raithawinak a tuah dingih cuihnuah helicopter thawn Muxima khuapi ah a feh ding.

Cuihnuah Mama Muxima Shrine tualrawn ah Rosary thlacamnak an nei dingih thucahnak khal a nei ding. Zanlam ah Luanda ah a kirsal ding a si.

April 20 Tlawngkai nikhat niah Pope Leo XIV cu vanzam thawn nisuahnak sak lam ih Saurimo ah a feh ding. Cuihmun ah kumupa pawl kilkhawinak inn pakhat ah a feh dingih cibaibuknak a nei hnuah Saurimo Esplanade ah Missa raithawinak a tuah ding.

Cuihnuah Pope cu Luanda ah a fehsal dingih Parish of Our Lady of Fatima Luanda ah Bishop pawl, Puithiam pawl, Brother pawl le sister pawl thucahnak a nei ding.

Equatorial Guinea: April 21-23

April 21 Tlawngkai nihnih ni zianglam ah Pope Leo XIV cu Luanda in vanzam thawn Equatorial Guinea ih khuapi a si mi Malabo ah a feh ding. Cuihmunah Pope cu President hauhruangah Teodoro Obiang Nguema Mbasogo thawn tonawknak an neih hnuah ram ih thunei tu pawl, Nunphung pawlkom aiawh tu pawl le ram palai pawl hnen thucahnak a nei ding a si.

Cuihnuah Pope Leo cu National University of Equatorial Guinea ih Leon XIV Campus ah nunphung aiawhtu pawl thawn tonnak an nei dingih thucah nak khal a nei ding. Cuihnuah Jean Pierre Olie Psychiatric Hospital ah riantuantu pawl le mina pawl cibaibuk in vehnak a nei ding.

Cuihnuah netabik a caanserh ah Pope Leo cu Equatorial Guinea ih Bishop pawl thawn a dangten tonnak  a nei ding a si.

April 22 Tlawngkai nithum ah Pope Leo XIV cu vanzam 3 thawn a feh sal ding. A hmaisaah nisuahnak lam kau ih Mongomo khuapi ah a feh dingih Basilica of the Immaculate Conception Mongomo ah Missa raithawinak a tuah ding. Cuihmunah Pope cu Pope Francis Technology School ah a feh ding. Cuihnuah vanzam thawn Tipi kap khuapi Bata ah a feh ding. Bata ah Pope cu Thawnginn ah a feh dingih cuihmun ih a umtu pawl a veh ding. 2021 March 7 ni ah ralkap sakhan pakhat ah a rak cang mi puakkuainak ruangah nunnak cemtu minung 100 luan le hliam tuartu 500 hrawng an um ih nunnak liamtu pawl hngilh lo nak ih an sak nak hmun ah vehvaihnak a nei ding.

Cuihnuah Pope Leo XIV in Bata Stadium ah mino pawl le innsungsang pawl thawn tonnak a nei dingih thucahnak khal a neih hnuah Malabo ah a kirsal ding a si.

Pope ih a Tuukhal khual tlawnnak ih netabik ni 23 ni Tlawngkai nili ni ah Malabo Stadium ah Missa raithawinak a neih hnuah Rome ah vanzam thawn a pok sak ding a si. Hi mi thuthang cu Vatican thuthangin kan ngan mi asi.