Islam Biaknak le Catholic Biaknak Thu
Islam biaknak cu leilung thlun ih biaknak tumbik pali lakih pakhat a si. (Leilung tlunih biaknak tumbik pali pawl cu Buddhism, Hinduism, Islam le Christianity tla an si.) Leitluni h Khristian umnak ram tampi ah Islam biaknak khal a um ve. Islam biaknak a tluntu pawl thawn rualrem ten um thei ding hi Khristian zate hrangah a thupi zet. (Islam biaknak thluntu pawl cu Muslim tin kawh an si.)
Islam biaknak thluntu pawl ih zumnak hrampi cu Abrahman ih zumnak ihsin a ra. Khristian pawl in Islam biaknak thluntu pawl thawn zangfah lainatnak neitu, ni netabik ih thuṭhen tu ding Pathian pakhat kan biak tlang a si, timi cu ziangtik hman ah hngilh hrimhrim lo ding a si. Hrekkhat Khristian zirhnak le zumnak cu Islam biaknak cabu sungah kan hmu thei. Jesuh le Mary par khalah Islam biaknak thuntu pawl in upatnak an nei. Cun Islam biaknak thluntu tampi in biaknak hnattuannak a phunphun ah lungtho zet in an tel ve.
Islam biaknak thluntu mi tampi in an nunnak cu Pathian hnen ihsin an ngah mi a siih Pathian hrang ih nung ding an si, timi an pom. Cun nuncan ziaza ṭha neih a ṭul timi le mi tlasam pawl hnenah zangfahnak neih ih bom ding timi khal an biaknak in thupi zet in a zirh.
Curuangah Khristian pawl in Islam biaknak thluntu pawl thawn upat awknak thawn biaknak thuruah khawmnak nei ding a thupi zet. Zumnak bangawk lonak le bang awknak pawl hlawm awknak neih ringring ding. Cutin biaknak pakhat le pakhat kar lakah upat awknak, remdaihnak le duhdawt awknak a um thei ding.
Khristian pawl in ram hrekkhat ih vakvai mi Muslim pawl (Islam biaknak thluntu pawl) cu Khristian ramah duhdawtnak le upatnak thawn cohlan ding a si. Khristian ramah Muslim pawl in an Islam biaknak cu zalen zet ih an tlun thei ding a thupi. Cuvek thotho in Muslim ramah Khristian pawl khal in an Khristian biaknak cu zalen zetih an tlun thei ding a thu ve. Khristian biaknak le Islam biaknak kar lakah buainak um lo dingin ralrin ding a si. Muslim pawl le Khristian pawl in Pathian pakhat kan bia a si timi cu ziangtik hman ah hngilh ding a si lo. Pathian fa kan si timi thei ih upatnak, rualremnak le daihnak hrangah kut kai awih hnaṭuan tlang ding a si.
Ref: The Joy of the Gospel, Pope Francis, (2013), pp.184-185.
