Pope Leo XIV ih Monaco a Tuukhal khualtlawnnak ding caan hman ding daan suah. (March 9, 2026)
Monaco ih a tlawnnak ding caanserh cu nazi 9 sungah a theh dingih a thupi mi tonkhawmnak vei 4 a tel thu theih a si.
Atlawnnak caanserh cu Monaco ih Prince Albert II thawn cibainak in a thok ding. Cuihnu ah Catholic zumtu pawl thawn tonnak, mino pawl thawn tonnak le a dang pawlkom pawl thawn thapek nak caanserh pawl a hmang ding asi. Akhual tlawnnak caanserh neta bikah Stade Louis II ah Missa raithawinak a tuah ding thu an suah a si.
Holy See Press Office in March thla 9, ah official in a tuukhal khual tlawnnak caanserh hman ding daan pawl an suah zo ih Pope Leo XIV in March 28 Zarhte ni thianghlim zarh thlen hlan ah Principality of Monaco ah a feh ding a si tiah an than. Cui a Tuukhal khualtlawnnak cu Pope ih a hmaisa bik European a tlawnnak a si vekin 2026 kum hrek sungah ramleng a khual tlawnnak ih a hmaisabik khal a si ding. Cuihnuah April thla ah Africa ah a reizet mi khualtlawnnak a nei dingih June thla ah Spain ram ah tlawnnak a nei ding a si.
Monaco Tuukhal khual tlawnnak ih Motto (thu luu) cu “Je suis le Chemin, la Verite et la Vie” a si ih a duhsan cu “kei cu lam zin ka si, thuthak ka si ih nunnak khal ka si” (Jn 14:6) ti a si.
Hi mi Catlang cu Gospel thuthangtha John in lak mi a si ih Pope in Khrih aiawh tu dinhmun in Khrih le a thuthangtha a phurtu tiah a mah le a mah a langter thu thupit in a langter.
Pope Leo cu Monaco ramah Helicopter thawn a feh dingih cui ram ih a tlawng hmaisabik tu Pope khal a si ding. Monaco cu a cozah dinhmun ah Catholic biaknak cu a cozah pi ih biaknak ah an ngamhnget ih a fate mi ram a si. Cuihmun ah khuasung mipi pawlkom le Biakinn ih pawlkom karlak ah thurel tlangnak pawl cu mipi thawn pehpar mi thurel nak ah thathnemnak tampi a um lai nak hmun a si.
Pope ih a tui a Tuukhal khualtlawnnak cu Principality of Monaco thunei tu pawl in a tuletu an sawmnak par ih hram bun in a tlawnnak a si tiah theih a si.
Cuitlunah khat le khat tuantlang mi tuanvo pawl kha hngetkhoh ter dingah tumtah a si. Cui tuanvo pawl ah minung nunram kha “a thawhnak in a cemnak tiang” upat in humhim nak, famkim in a tel mi kiangkap kilhimnak ngaihsaknak le kan zate ih ta ( zate inn) a si mi kha humhimnak pawl a tel ding ih lehpannak lam ah ngaihsaknak khal a sawhkhih.
Prince Albert II in January 17 ni ah Vatican City ah Princess Charlene thawn an tongawh ih a tui Pope ih khualtlawnnak cu Principality of Monaco le Holy See karlakah a hlan khan ih an nei cia mi rinum zet a si mi ram Palai thawn pehtlaihnak kha pehbet in hnget ter dingah a si thu a sim.
March thlacem lamah tuah ding mi a tu caanserh cu pawlkom thawn pehpar mi le biaknak lam thawn pehpar mi tiah hmuhnak pahnih tel mi “duhsan pahnih” a nei mi caanserh khal a si ding tiah an tarlang. Cui khualtlawnnak cu thurel tlangnak, remdaihnak le tuanvo lak tlang mi pawl kha thlarau lamah “ruahsannak ih a hnget mi hminsinnak” pakhat ai a awh ding thu khal duhsan a nei ding.
Pope Leo cu zinglam nazi 7: ah Vatican City in Helicopter thawn a pok dingih zing 9:00 am ah Monaco Heliport ah a thleng ding a si. Cuihmun ah hmuahnak caanserh khal a um cih ding.
Cui hnuah Prince’s Palace of Monaco ah a feh dingih caanserh pakhat hmannak a nei dingih Prince of Monaco le a sungkua pawl tonnak caan serh a hmang ding.
Thuanthu ih um mi innpi ah Pope in Monaco Prince thawn an tongaw ding ih hi mi tonawknak cu mipi a tonnak pali sungah a hmaisa bik a si ding.
A pahnihnak caanserh cu zing nazi 11:00 am ah Cathedral of the Immaculate Conception ah tuah ding mi thurel tlangnak sungah Catholic zumtu pawl hnen thu cahnak a nei ding. Cui hnu minutes 45 rei hnuah Pope cu Church of Sainte- Devote hmai tualrawn ah mino (catechumens) pawl thawn tonnak a nei ding. Hi tawk hmun khal ah Pope in thusimnak a nei sal ding asi tiah an sim.
Sun sunrawl ei theh caan malte hnuah Pope cu Stade Louis II ah a feh dingih hi mi lehpannak hmun cu 1922 in 1949 sungih Prince Louis II ih hmin nei mi asi. Stade Louis II cu As Monaco lehpannak pawlkom ih France ram Ligue 1 championship ah inntek dinhmun in zuamawknak hmun a si. Cuihmunah Pope Leo XIV in Missa raithawinak hoha in a tuah ding a si.
Cu mi thehah Pope cu Monaco in a fehsalnak caanserh heliport ah tuah a si ding. Cu mi in zinglam 5:45 am ah a poksuak dingih cui hnu nazi pahnih zikte a rei ah Rome khuapi ah a thleng sal ding tiah theih a si.
Motto le Logo
Caanserh thawn Motto le Logo khal suah a si. An tarlangnak vekin Logo ah kehlam kap parlam ah Pope ih zuk a dum le rang thawn zuk mi pakhat a tel ih mithmai pan phah in bomnak pe mi zuk a si. Cuizuk ah biakthawinak ih hruk mi Liturgical vestments, mitre le pastoral staff ( Tuu khal kianghrol) a tel ih a Tuukhal khual tlawnnak le biaknak lam kha langter duh mi a si.
Zukih vorhlam ah Monaco ih Innpi Prince’s Palace of Monaco ih Tower vekin langter a si ih hi mi zuk in Monaco kha rampi ih mahte ukawknak le Siangpahrang fapa uknak ram an sinak a langter. Meisa vannak vek kha a aihre rongin tuah a si ih a tlunlam zate in Vatican City Alan thawn bawngran dingin tumtah mi a si.
A hnuailam ah a Tuukhal kualtlawnnak theiternak cafang pawl an tel ih a laifannak ah “Leon XIV” tiah cafang tum in langter a si. Cuihlei ah “Monaco” ti mi cafang kha ram ih Alan ih a mawiternak a si mi a sen zawng le Siangpahrang sungkua Alan vekin a hleice in tuah a si. Azaten in Logo cu Pope le a khualtlawnnak ih biaknak lam thu kha thazet in a langter ih Catholic Biaknak kha a Cozah Biaknak ih ngamhnget mi Monaco ram sunloih cohlan nak thawn a bangaw ter tiah an tarlang. Hi thuthang cu Vatican thuthangin a remcang thei bik ih kan ngan mi asi.
