“Remdaihnak hrangah hnatuan uh si” hriamhrei tel lo in hawl tlang uh si. (March 03, 2026)

Pope Leo XIV nak in Castel Gandolfo ih Villa Barberini inn a lenglam ah thuthang latu pawl hnen a raksim ih “Remdaihnak hrang hnatuan cio dingah le thurel tlangnak khaisang dingah” a mai dilnak kha a rak sim bet.

Remdaihnak hrangah thlacam uh si. Remdaihnak hrangah hnatuan tlang uh si, huatawknak pawl kha malter uh si. Leitlun ah hin huatawknak pawl cu a thang rero tiah Pope Leo XIV in Castel Gandolfo ih amai colhnak hmun ih simnakah Villa Barberini inn leng lam ah thuthang latu pawl burkhat hnenah a rak sim.

Nisuahnak a laifannak hmun ah doawk nak a sosang ih leitlun hmun tinah thinphannak le khatlekhat parah hmuh thiamawk lonak a tam vivo vekin Pope in remdaihnak ih tumtah nak tuahsuak dingah a rak forhfial. Cuitlunah mitin in thu reltlang thiamnak khaisang dingah thutak in zuam dingah le Buainak pawl kha reltlang dingah hriamhrei tel lo in a san hawl cio dingah a rak thang phawk.

Hi tongfang pawl cu kan dung zarihpi ni Angelus thlacamnak ah a rak sim mi ttong pawl kha a rak sim sal mi asi. Culaiah American le Isreal pawl ih Iran an donak le nisuahnak a laifannak hmun hrek khat ah Iran ih bom a rak dennak pawl thawn pehpar in Pope Leo XIV in “Daihnak le remnak kha khatlekhat hrinhro awk nak pawl a silole siatsuah mi pawl ih sunnak, harsatnak le thihnak a can ter mi hriamhrei pawl hmannak in a ngah thei lo thu rualawk nak a um mi a tlaitluangih tuanvo laknak a nei mi thurel tlangnak lawngin a ngah thei a si tiah a rak sim. Hi mi cu Vatican thuthangin kan ngan mi asi.