30. Ziangruangah zumnak cu mimal tuahnak a siih Pawlpi ih tuahnak khal a si kan ti thei?
Zumnak cu Pathian hnen ih mimal ih lehrulh mi a si le mimal zumnak a si. Asinan, cuih mimal zumnak cu Pawlpi ih zumnak khal a si thotho. Ziangruangah tile Pawlpi in cuih mimal zumnak cu ‘kan zum’ tiah a phuan ruangah a si. Pawlpi in Thiang Thlarau ih zaangfahnak laksawng thawn zumtu pawl ih zumnak a cawm a si. Curuangah Pawlpi cu Nu le Zirhtu a si. “Zo khal in Pawlpi cu nu vekin a nei lo a si ah cun Pathian khal pa vekin a nei thei lo a si” tiah mi thianghlim Cyprian in a sim.
31. Ziangruangah Pawlpi ih zumnak thlacamnak pawl an thupi?
Pawlpi ih thlacamnak pawl cu an thupi zet. Ziangruangah tile cumi Pawlpi ih thlacamnak pawl ruangin zumnak thudik cu awkam in miih hnenah kan sim, kan rel, kan phuang suak thei a si.
32. Ziang ruangah “Pawlpi ih zumnak cu pakhat a si”, tin kan ti thei?
Pawlpi cu ṭong dang, nunphung dang tivek a neitu miphun dangdang thawn khat ṭheh hmansehla Jesuh hnenih a ngah mi le dungthluntu pawlih thuzirh mi peh zomnak ihsin zumnak pakhat cu awkhat ten a phuang a si. Pawlpi in Pathian pakhat, Pa, Fapa le Thiang Thlarau a zumih rundamnak lamzin cu mi zakip hnenah a phuang. Curuangah thinkhat lungkhat ten Pathian ih Ṭongkam sungih a um mi thuhla pawl cu cangannak in siseh, sim le zirhnak in siseh Pathian ih thuthangṭha a si tiah Pawlpi ih a sim mi kan zum a si.
