Judah biaknak le Catholic biaknak karlakah, zummi zaten bangrep aw thluh lo hman sehla, pehtlaih awknak thukzet a um. Ziangruangah tile Pathian ih tuahmi thukam ruangah a si. Mithianghlim Paul in hitin in sim, “Ziangah tile zo a hril, zo a thluasuah ti thu ahcun Pathin in a thinlung a ṭhin dah lo” (Rom 11:19). Catholic Kawhhran le Judah biaknak in Baibal Cathianghlim ih thupit daan an pom veve. Khristian pawl in Judah biaknak cu miphun dang biaknak a si tiah ti a theih lo. Cun milem pawl tlansan ih Pathian riantu pawl tikhal in ti a theih lo. (Judah biaknak ah milem hman a theih lo.) Judan mi pawl thawn Pathian pakhat kan bia ih a sim mi thu khal kan zum a si.
Biaknak thuruah khawmnak le rualpi awknak cu Jesuh thluntu pawl in nunpi mi pakhat a si. Catholic pawl le Judah mi pawl karlak ih rualpi awknak a fek sinsin vekin a liamcia mi caan ih rualrem awk lonak le riahsiatnak a phunphun pawl cu a poi zet mi riahsiatnak a si timi vun theih sal a si ṭheu.
Pathian cun a kamcia mi a miphun pawl hnenah catbang loin hna a ṭuan. A thusim mi ihsin milai hrangah fimnak tampi a suak ter. Catholic Pawlpi khal in Judah biaknak ihsin tampi zir mi a nei. Hrekkhat Khristian zumnak pawl cu Judah biaknak zumtu pawl in an cohlang thei lo. Tahṭhimnak ah Judah biaknak tluntu pawl in Jesuh cu Messiah a si; minung cannak latu Pathian a si timi an zum lo. Cun Judah biaknak zumtu pawl in Baibal thar an pom lo. Sikhalsehla, Jesuh cu Bawi le Messiah a si timi cu Catholic Pawlpi in a phuang ringring a si.
Ziangkhal a va silen, Pathian kan zum ih Baibal hlun kan siar veve ruangah pakhat le pakhat kan thei thiam aw sinsin ih Pathian ih ttongkam ih thupit daan khal kan thei sinsin. Cui hleiah dingfelnak le milai ṭhansonak a phunphun hrang khal ah lungrual ten kan ṭuantlang thei a si. Curuangah, Catholic Kohran le Judab baknak kar ah theithiam awknak le rualremnak um thei dingin biaknak thurel tlangnak (religious dialogue) cu ziangtluk in a thupi a si timi a lang.
Ref: The Joy of the Gospel, Pope Francis, (2013), pp.181-182.
A ngan tu – Rev. Fr. Lucas Tha Ling Sum
