January – 31
John Bosco cu 1815, August 16 ah Turin khuapi thawn a nai awknak hmun Italy ram, Becchi ah a rak suak. A Nu le Pa cu lothlo mi, miharsa an si. Kumnih a kim ah a Pa in a rak thih san ih a Nu in a fa le pawl hrangah zonzai zet in hna a rak tuan.
John a hung than deuh in a Nu’i hnatuan tha zetin a rak bawm. Neta lam cun puithiam can a rak duhzet nain a Nu a rak sim ngam lo. Ziangahtile Minor tlawng kai nak man a kuan thei lo ding ti a ruah ah a rak sim ngam lo.
Asinan, kum 16 a ti ah Siangbawi tlawng kai dingin a rak feh. Tlawng uk tu Siangbawi Pai thusim mi zaten pakhat te hman hrelh lo in a rak sim thei sal. Kum 1841 ih siangbawi cannak a rak ngah hnuah Turin khuaah siangbawi a rak tuan.
Cui khua ah cun tlawngta pawl, mino pawl le lamzin parih nauhak pawl hrangah nasa zetin hna a rak tuan. Nauhak pawl Christian nunram le tuanvo pawl thaten an theih thei nak dingah St. Francis de Sale cazirnak tlawng a rak phuan sak.
Bosco in cui MIthianhlim ih thinnemnak le um tu dan a duh tuk ruangah tlawng din suak thei dingin miliang zet nunau pakhat in inn a rak pek ih cui inn sung khal ah St. Francis de Sale ih zuk lem tla a rak ret ih a nutu zia khal arak cawng. Cat bang lo ih a hnatuan nak cu a nu khal in tha a rak pe theu.
Nuncan ziaza tha le Christian tha an can theinak dingah Bosco in |Boot tuahnak, puan thit nak le cauk tuah nak pawl a rak phuan sak. Minung pehtlaih awk nak a thupit tuk ti a theih ruangah zaan tim tiang thuthang le ca uk ngan nak in a tuk cu a rak hmang theu. A thlacamnak cu “Thlarau pawl cu i pe awla a dang cu lak theh aw,” ti mi a si.
Kum 1859 ah Salesian a rak din thok. 1872 ah Sister tlawng pawl a rak din. Kum 1888 ah John Bosco cu a nunnak a rak cem ih 1934 ah Mithianghlim ah an rak nemhnget.
Mithianghlim John Bosco bangin taksa le thlarau lam ih zuamnak kan neih thei nak dingah zuam tlang uhsi. Midang hrangah leitlun kan nunnak caan tawi te hi hmang in Pathian ah thinlung rin um nak ret in tuan tlang uh si.
Mithianhlim Bosco hi mino pawl kilkhawitu Mithianghlim a si vekin kan nih khal mino pawl Pathian hnenih a hruai suak tu kan si thei nak dingah thla in cam sak aw tiin thlaza cam tlang uh si.
