Ziangruangah Khristian pawl in biaknak thurel khawmnak (ecumenical dialogue) hrangah kan ttuan a si tilen Jesuh ih thlacammi “pumkhat an si theinak ding in” (Jn 17:21) timi hi a tak leitlun ah cang suak seh timi tumtahnak kan nei ruangah a si. Khristian pawl pumkhat ih kan can thei a si ahcun Jesuh ih thuthangttha cu khua zakipah a karh zar sinsin ding a si.
Zumtu pawl in Pathian hnenih khualtlawng tlang mi kan si tikha hngilh hrimhrim ding a si lo. Cule kan khualtlawnnak ah pakhat le pakhat zumawknak neih a ttul. Ni bangih a tleu mi Pathian ih daihnak cu cuan phah in hmailam ih feh a ttul. Pakhat le pakhat zumawknak cu daihnak hrampi pakhat a si. Jesuh in, “Daihnak a tuah tu pawl cu mi thlawsuah an si,” a ti (Mt 5:9). Remnak tuah tu kan si ahcun Profet ih a rak sim mi tling tertu ah kan can ding: “An ralnam cu leilehnak tuhmui ah an ser ding” (Is 2:4). Leitlun ih daihnak le pumkhat sinak cangsuak thei dingin biaknak thurel khawmnak in tampi ttuanvo a nei.
Ahleice in Asia ram le Africa ramah zumtu pawl pumkhat si thei dingin ttuan ding a poi mawh zet. Ziangah tile Asia ram le Africa ramah zumtu tampi an um. Asinan Khristian pawl kar lakah remawk lonak a suak ttheu. Khristian lakih tthentthek awknak a um mi cu a poi zet mi a siih Jesuh ih thuthangttha karzaihnak dawn kham tu a si. Leiltun ah Jesuh ih thuthangttha a thei hrih lo tu tampi an um. Zumtu pawl pumkhat tein kan um a si ahcun cui Jesuh Khrih thuthangttha a thei hrih lo tu pawl hnen ih thusim hi tlam a tling zet ding. Awl ten Jesuh Khrih an cohlang thei ding a si.
Thiangthlarau ih hnattuannak kan zum ngah a si ahcun pakhat le pakhat hnen ihsin zir ding tampi kan nei. Midang hnen ih thuthangttha sim le rel menmen a si lo. Thiangthlarau ih laksawng an co mi cu biaknak thurel tlangnak in kannih khal in an hnen ihsin kan co ve ding. Cuvek thotho in Thiangthlarau ih laksawng kan co micu annih khal in kan hnen ihsin an co ve ding a si. Thahtthimnak ah Catholic pawl in Orthodox pawl thawn biaknak thurel khawmnak an neih asilen Catholic pawl in bishop pawl ih pumkhat sinak le a thupitnak an thei sinsin thei a si. Pathian hnen ihsin laksawng kan co mi cu kan hlawm aw a silen Thlarau Thianghlim in thudik le tthatnak ah lam in hruai sinsin ding a si.
Ref: The Joy of the Gospel, Pope Francis, 2013.
A ngan tu – Rev. Fr. Lucas Tha Ling Sum
