America ih cangan tu Gary Vanynerchuk in Twelve and a Half timi cauk sungah hlawhtlin ih nuam dingin minung pawl ih thinlung ah a um ringring dingmi Emotional ingredient 12 kha hi tin a lang ter. A sim bet mi cu “ nan nunram ah hlawhtlin le nuam ten nan um duh asi le a dang zianghman ti tuk ih tuah a tul lo. Tu sim dingmi 12 lawng kha hmaisa ah tuah saan uh” a ti. Sile hi Emotional ingredient 12 cu ziang pawl an si pei.

1. Lungawi thiam nak thinlung

  Nunram ah hlawhtlin ih nuam duh sile lungawi thu sim ding mi pawl kha lungawi thu sim tengteng a tul. Mai innsang, mai hnatuan nak sung ih hnatuan pi, rawl kaankhat tidai khuatkhat do dah tu ti pawl mah that nak ding hrangih in bawm tu pawl kha lungawi thu sim sal thiam ding.

2. Mah le mah theihawk nak thinlung

 Minung timi cu mai thuhla mah in theih ding kha a thupi bik mi asi. Midang that lo nak, midang thuhla ah tel nak a tam sile mai hnen ah nuam nak kha a mal deuhdeuh ding asi.

3. Tuanvo lak thiam nak thinlung

 Minung ti ih kan ra suah cun mai tuan mi hna, mai tongmi tongfang kha menmen ih tuah a ngah lo vekin mah in sual nak tuah ngah pang caan ah mai tong mi le tuah mi kha tuanvo lak thiam a tul.

4. Thatnak hmu thiam nak thinlung

 Mitin in thatnak hmuh thiam ding kha a thupi. Hi mi thinlung cu tihnak thinlung a um lo vekin ton rero mi harsat nak pawl kha pahtlang ngam nak thinlung neih mi kha sim duh mi asi.

5. Zawnruah nak thinlung

  Minung nunram ah nuam ding, mitha si dingin zawnruah nak thinlung neih a tul. Zawnruah nak thinlung a um lo le cu mi pawlkom awk nak ah um a ngah lo vekin a tha lo mi pawlkom awk nak ah a cang men ding.

6. Zangfah thiam nak thinlung

 Zangfah nak timi cu Kawhhran tin le pawlkom awk nak tin ah an sim mi a thatuk mi thinlung asi. Nunram ah nuam duhtu minung pakhat sile zangfah thiam nak thinlung nei lo tu pakhat si dingin a thupi tuk.

7. Zuam duh nak thinlung

 Mi pakhat ah zuam duh nak kha dungsip lo in zuam nak thinlung a um lawngah mah peih mi hmun ah mah tuah peih mi hna pakhat kha kan kaihum thei ding asi.

8. Theihpeih nak thinlung

 Thil pakhatkhat kha zir peih nak thinlung a pin lawngah minung timi cu hmuntha pakhat ah kan thleng ding asi.

9. Thinsau ding

 Voikhat sung, voihnih nak sung thotho a sinan a voi thum nak cun sung ding tih ruangih tuah ngah lo mi thil pawl nunram ah ziangzat lai a um zo. Nunram ah hlawhtlin duh sile zuam peih nak thinlung lawng a ngah lo. Sung nak pawl kha pahngam in thinsau ten um ding khal a tul asi.

10. Pom thiam nak thinlung

 Ziang vek minung ka si, ziang ka si peih, ka feh nak lamzin ah ziang ka tuah phah tul ti mi ruahnak um mi tla nuam nak ding hrangih a tul mi thil pakhat asi.

11.Tangdor nak thinlung

 Ziang vek kan cang hmanah sinak sang lo, minung kha mah minungpi vekin pawlkom, paisa dungthlun tu si lo. Ziang vek minung ka si ti porhawk ciamco a tul lo. Hi vek thinlung neih cu mah le mah tangdor nak thin lung neih le thinlung tha neih nak a si.

12.Tumram sang mi thinlung

 Tumram a sang mi thinlung khal nunram ah um lo theih lo ih tul mi asi. Tumram nei lo mi minung cu long ah a hnah um loin tilipi ah lamzin hlo ih ziangtuah ding thei lo tu long mawng tu vek men kan si ding.Tu ih sim mi emotional ingredient thuhla cu cangan tu Gray Vaynerchuk ih leitlun ih hminthang mi cauk a si mi Twelve and a Half ti mi ah a lang ter mi thuhla pawl an si.

Credit