Catholic Kohhran le Anglican Kohhran karlak ah remawknak, theihthiam awknak le pumkhat sinak a um sinsin. Kum 1966 ihsin fiangten kan hmu thok. Catholic Pope Paul VI nak le England ramih Anglican Archbishop Michael Ramsey cu naih niam aw zetin kum 1966 March ni 23 sunah an tong awih a sunglawi zetmi le a thupi zetmi thu rel tlangnak an nei. Catholic Kohhran le Anglican Kohhran kar lakih pawlkom awknak a um vivo ruangah Pathian hnenah lungawi thu an sim. Cui an tonawk ttumih an lungkim tlang mi thupibik pawl cu a tanglam vek in a si.
A pakhatnak ah, Khrih in a dungtlungtu pawl hnenih a cah ta mi “pakhat le pakhat nan duhdawt aw pei” a timi thu tlun dingin lungkim tlangnak an nei. A liam cia mi caanih rem awk lonak hmuahhmuah cu Pathian kut sungah tanta tahrat ih mithiang Paul ih sim mi thlun dingin timtuahnak an nei. Paul in, “Ka dunglam ih a luan cia mi thil kha hngilh san tahrat in ka hmailam ih a um mi kha ban dingah ka dawh rero a si. Hmui tin mi lamah zuam man laksawng ngah dingin dingten ka tlan. Cui laksawng cu Pathian in Khrih Jesuh sung ihsin kumkhua nun dingah in run kawhnak kha a si,” tiah a ti (Phil 3:13-14).
Cun a pahnihnak ah Catholic Kohhran le Anglican Kohhran ih a um mi Khristian zaten pakhat le pakhat upat aw dingin le unau bangih duhdawt aw dingin nemhngetnak an nei. Zumtu pawl pumkhat cang thei dingin tiih Khrih ih thlacam mi tlamtling thei dingin Thuthangttha le biaknak daan pawl cu thupi ah re ih biaknak thu reltlangnak nei ding in tumtahnak an nei tlang.
A pathumnak ih an lungkim tlang micu biaknak thu reltlang tikah baibal, daan thunthu le biak daan lawng rel loin khat lam veve ih harsatnak pawl khal rel cih a ttul timi a si. Pope le Anglican Archbishop in zumnak le sacrament nunnak ah pumkhat si thei dingih dawnkham tu tampi an um a si ti an thei. Asinan hmai leiah pakhat le pakhat karlakah theithiam awknak um dingin le a thuk sinsin le a fek sinsin mi duhdawtnak um thei dingih zuam tlang ding in siseh, harsatnak a phunphun neh thei ding in siseh, ttuantlang a ttul thu an sim.
A netnak ah, thinkhat lungkhat tei kan ttuantlang nak in Pathian ih thlawsuah le Thiangthlarau in lam hruainak thawn Jesuh Khrih ih thlacam mi “pumkhat sinak” cu a tlamtling sinsin ding. Cuticun leitlun ah remnak le daihnak a tleng ding a si, tin lungkim tlangnak an nei a si.
Ref: Vatican II, Unitatis redintegratio, 1965.
