January 21

Tuu note ti duhsan a nei mi hmin neitu mithianghlim Agnes cu mi mawi zet Rom fala pakhat asi. A mah le a mah Pathian hrangih a ap awk ih hleiah a falat nak khal cu minung mit ih hmuh thei lo mi Khrih hnenah ap tu asi. A hngetkhoh zet mi a lungput cu ol ten thleng thei asi lo thu a theitu hrekkhat pawl in Christian asi thu an phuang ih mawh an rak thlut.

Kum hleihnih a tiah thu then tu ih thusuh nak a rak tong. Cuo thuthentu in nem ten lemm nak in siseh, hringhro phah in siseh,   rel tlan nak in siseh a sim rero nan a tumtah mi cu a thleng thei hrimhrim lo. Meisa thawn hremnak a phunphun a tuar phah in a hringhro nain Agnes ih zumnak cu a thleng aw thei cuang lo. Cui hnuah nunau tha lo pawl um nak hmun ah an rak kuat.

A mah sualpi dingih a zuam rero tu tlangval pakhat tla cu a mitcaw asi. Tlangval pakhat in cozah lam ih thunei tu hnenah a sim ih thunei tu pawl cun an hrem ih thah dingin lamzin pi ah lawngfangkhen in an hnuh tikah thla a rak cam nak in taklawng ih a ummi a ruangpi cu a sam in a run khuh lohli.

Cui hnuah Agnes cu ur ding in meisa an muah ih zanthing cu kang thei lo ih a um hnuah meisa khal a ruangpi thawn hlazet ah a rak pet. Cui hnu khalah thu an sut rero nan keimah i duh hmaisabik tu hi ka hril sawn tiah a rak let.

Kei cu kumkhua ka Bawipa ka Pathian hrangah thukam nak ka tuah zo. Cui thukam cu ka pelh sal nawn lo ding tiah a rak sawn. Cu tikah an thin a heng tuk ih a lu an tan ih a thi. A ruak cu Nomantana lamzin ih thlaankua sungah an rak vui asi.

Kum tampi a rung rei hnu ah a mah le mah upat nak ah Biakin pakhat a run sak a si. Mithianghlim Agnes in ka thisen le nan naam cu a hnawihnih thei ding nain, Khrih ka ap cia mi ka ruangpi cu ziangtik hman ah bal dingin nan tuah thei lo ding tiah an thah hlan te ah a rak tong.

A mai puai ni cu January 21 ni ih hmang dingah Rome khuapi ih a mai Biakinn ah Tuu pahnih thawnap nak an run tuah thei a si.

An thah mi tuu pahnih ih hmul cu an met ih Bishop pa orh ding mi ah an tah theu. St. Peter le St. Paul puai ni a kim hlan ni khat duh ah cui an tah mi thi cu pulpit ah an ret theu.

Mithianghlim Agnes cu Bawipai hrangah a nunnak a takssa ruangpi cu ap aw tu Mithianghlim a si. Ziangvek ih sual sawmnak le hremnak phunkim tuar hman sehla Bawipai hrangih a neih mi thukam cu pelh ter lo in a hnget khoh zet mi lungput thawn a nunnak pam hmai/ui lo in Bawipa a dinpi ngamtu mithianghlim a si.

Tuni ah kan nih khal Bawipa duhnak tuat in mithianghlim Agnes bangin kan thukam hnget ter uhsi. Pumpek ih hna a tuantu pawl in mai thukam hnget ter sin in Baptism kan lak laiih kan thukam mi khal hngilh men loin Pathian hmai le minung hmai ah hnget ter sin dingin tuini January 21 ih kan tuah mi mitianghlim Agnes hnenah thlacamnak thawn zangfah dil tlang uhsi.