Thlanglam Spain ram ah zarhpi sun ih a rak cang mi a malbik minung 39 an nunnak a liam ih mitam zet cu hriamhma an rak ngah nak tlangleng cangsual nak ah siat a tong tu zate thawn hmunkhat ih a um thu Pope Leo XIV in a sim a si.
Vatican thuthang
2026, January 18 (Zarhpi Ni) ih thlanglam Spain ih a rak cang mi tlangleng le tlangleng cang sualnak ruanah a mal bik minung 39 an nunnak a liam ih mitam zet hriamhma an rak ngah nak ruangah Pope Leo XIV in nunnak a liam tu pawl hrang thla a rak cam sak ih hriamhma a tuartu pawl ih innsungsang pawl hnen khalah cui thuih “A riahsiat zet thu capi” a rak kuat a si.
January 19 niih rak suah mi Spain tongih ngan mi Vatican ih Secretary Cardinal Petru Parolin ih sign a thu mi cablegram in Pope in hi cangsual nak kha a thei ih “A riah a siat zet thu” le “Hnemnak, thlarin nak pawl thawn hriamhma a tuartu pawl zangrang ten dam nak an ngah sal thei nak dingthu” thlaza a cam sak a si.
Cui theh in mibawm tu pawl dinhmun in “Mibawmnak hnatuan pawl tuan vivo dingah” a forhfial ih, “Our Lady of the Pillar ih thlacam sak nak thawn hnemnak an ngah theinak dingah thlawsuah a rak pe a si.
Zarhpi Ni zaanlam ah thlanglam Spain ram Adamuz khua lamin Madirid khuapi lam pan ih a feh mi tlangleng cu zin a nal ih khatlam ih a ra rero tu tlangleng pakhat thawn an rak pah awknak a si. BBC thuthangih an sim mi ah tlangleng pahnih parah a to tu mipi le hna a tuan tu pawl zate kom in minung 400 hrawng an rak thluh thu theih a si.
Spain ram hotu pawl in a malbik minung 39 an nunnak an liam thu an ngemhnget ko nan nunnak a liam tu zate cu tu ai in an tam thei lai ti a si. Mi bawm tu pawl in minung 122 cu sii vai lam in tuamhlawm nak an pek ih minung 48 cu siizungah tawm hlawmnak an pe rero lai a si. Cangsual nak a can nak cu fiangfai zet in theih a si hrih lo.
Let tu – Olivia Lal Ruat Mawi
Thuthang – Vatican thuthang
