Veikhat lai ah mipakhat cu a mawi zet mi nunau pakhat thawn an nei aw. A mawi lawng si loin thinlung tha nei mi a nupi cu a duh zet. Nikhat ah a nupi cu taksa vun lam natnak a nei. Remcang zetin nikhat cu a pasal khal hnatuan thu thawn khual a tlawng. Khual a tlawn nak ih a tlun phah ah motor accident a cang ih a mit pahnih in khua a hmu thei nawn lo.

Hi hmun ah cawl ta sehla ruat hnik aw taksa vun lam natnak nei le khua hmu lo pakhat ih innsungsang cu ziangtin, ziangvek in an hmang vivo ding? Ziang a cang vivo ding tin na ruat?

A ngaingai ahcun an pahnih ih an duhdawtnak cu a thleng aw cuang lo. A hlan vekin an nuam aw ih duhdaw aw zet in an um thotho. Caan a liam vivo ih a nupi ih natnak cu a besia vivo. Khua hmu lo a pasal cun a nupi cu a natnak ruang ih a hmuihmel a siat thluh kha a thei lo a bang. An pahnih cu a hlan aiin an duh aw sinsin.

Netabikah cu a nupi cu a nat nak ruangah a nun nak a cem. A pasal hrang ahcun sunnak nabik pakhat a si tin a ruat. A nupi an phum ih a thaisun ah a pasal cu a nupi an phum nak khua suahsan dingin thu a botcat.

Cuicaan ah an inn hnen pakhat cun a rak biak “Khua na hmuh lo caan kulh sung na tul sam mi hmuahmuah na nupi in phun lo ten a lo tuah sak ih tu nangmah te lawng na si ah teh ziangtin na tuah nawn ding harsat nak tumpi na tong” tin a ti.

A nih in “Ka rual… a ngaingai ahcun ka mit a caw lo. Ka hmu lo aw ter men a si. Ka nupi cu a natnak ruangih a siat mi a hmel kha nitin ka hmu ti a theih a si le cui tuarnak cu a natnak ruangih a tuar mi aiin a thin a naa deuh ding. Cui a thinnat ding cu ka hmu thei lo. Hmuihmel lam a mawi nawn lo khal le a thinlung a tha ringring tu pakhat a si. A thinlung a that ruangah ka hrangah nupi tha pakhat a si. Keicun a lungawi ih a thinnom ding kha a hmu duh tu ka si ruangah tu vek ih lem ka can nak a si” tin a ti.

Hi thuanthu cu hihmuah a si.

Zirnak in pek mi cu leitlun ah khat le khat rem aw ding hrangah hrekkhat thil pawl cu hmuh lo awk ter a tul. Cah lo nak, famkim lo nak ti mi cu mitin kan nei cio. Curuangah zohman mi famkim kan um lo an ti nak a si.

Mipakhat ih cah lo nak, famkim lo nak kha zoh in neh tum tu cu micak lo pawl ih tuahnak a si. Cumi sungah nangmah tel tum panghlah.

Pakhat ih tul sam mi kha pakhat in bawm in thinlung sungih duhdawtnak dik thawn kom aw a si le a nuam zet mi kiangkap pakhat a cang suak ding a si.

Credit to owner with respect