Khristian pawl pumkhat si thei dingih thlacamnak zarh a thoh nak ih hminsinnak ah Pope Leo XIV in khristian kar lak ih a langsar mi rualrem nak hrang thlacamnak kha a thar ih thok sal dingih forhfial nak le hi caanserh ih thuanthu kha in thei ter sal a si.

January 18 Angelus thlacam theh ah Pope Leo XIV nak in tuini ih kan tuah mi a liam cia kum zabi 2 hrawng ih rak thok mi ‘Khristian pawl pumkhat si thei nak dinghrang thlacamnak zarh” hi caanserh cu Pope Leo XIII in “Nasa zet ih a rak forhfial mi” caanserh a si ih a liam cia kum 100 ah ‘Khristian pawl rualrem nak hrangah niriat sung thla cam dingih ruahnak peknak’ in a hmaisa bik a rak famkim a si.

Tui kum thlacamnak zarh ih a thupi bik Motto cu Paul in Eph khua ih ca a kuat nak “Pathian in a lo kawh tikah a lo kawh san mi ruahsannak cu pakhat a si vekin ruangpum pakhat a um ih Thlarau khal pakhat a um” (Eph 4:4) kha hrambun in Pope cun forhfial nak a rak pe a si.

Hi thlacamnak le ruahawk sal nak pawl kha Armenian Apostotic Church ih kawhhran phunkip pawlkomnak ih tuah sak mi Ecumenical pawlkomih tuahmi a si.

Pope Leo XIV in “Curuangah khristian zate ih a famkim le a langsar mi rualramnak hrang thlacamnak cu nasa zet ih tuah dingah Catholic kawhhran mipi pawlkom zate kha ka lo sawn duh” tin a rak sim a si.

Hi rualrem nak hrang thlacamnak ih forhfial nak cu January 25 ni zarhpi sun ih theh dingmi, hi zarhkar sungih ruahawk sal nak thu thawn a um ringring dingthu a sim bet a si.

Tuah dan kel vekin January 25 ni Paul ih nunthleng awknak puai (Solemnity of the Conversion of Saint Paul) ah Pope Leo XIV cun Rome caan 5:30 pm ah “Khua lengih um mi St. Paul Basilica” (Basilica of Saint Paul Outside the Walls) ih tuah dingmi zaanlam thlacamnak (Vespers) kha a hoha ding a si.

Let tu – Olivia Lal Ruat Mawi

Thuthang – Vatican thuthang