Catechism of the Catholic Church cauk sungta kan run lo hlawm a si
Pathian ih Thuphuan Pehzomnak
- Ziangruangah, ziangtin, Pathian ih thuphuan cu pehzom a si?
Pathian in “leitlun minung hmuahhmuah a run duh. Thudik le thuhman a si mi Jesuh khal thei ter a duh hai” (I Timote 2:4). Curuangah Jesuh cu tlangaupi ding a si. “Feh uh la miphun zakip va zirh uh” (Matthai 28:19). Hi mi cu dungthluntu pawl ih Thuanthupi in a ṭuan a si.
- Dungthluntu pawl ih Thuanthupi cu ziang a si?
Jesuh ih thuthangṭha phuansuahnak cu dungthluntu pawl ih thuzirknak tiah kan ko. Zumtu pawl an rak um thok ihsin, thusimnak in siseh, an nunnak in siseh, thinkhat lungkhat ih an um khawmnak in siseh, Pathian an biak khawmnak in siseh, cangannak in siseh hi dungthluntu pawl ih Thuanthupi cu tuini tiang pehzom vivo a si.
Dungthluntu pawl in Jesuh le Thiang Thlarau hnen ihsin an zir le an ngah mi zaten anmah aiawh tu bishop pawl hnenah an simsin ih bishop pawl khal in anmah aiawh tu bishop pawl hnenah leithlun cem tiangin an simsin vivo a si.
- Dungthluntu pawl ih Thuanthupi cu ziangtin a cang suak?
Dungthluntu pawl ih Thuanthupi cu a tanglam vek in phun hnih in a cang suak a si:
(1) A nung mi Pathian ih Ṭongkam simsinnak in le
(2) Baibal Ca Thinghlim in a si.
- Dungthlutu pawl ih Thuanthupi le Baibal cu ziangtin pehzom awknak an nei?
Dungthluntu pawl ih thuzirnak le Baibal cu naih aw zet in an pehzom aw a si. Mangbangza Pathian ih Pawlpi sungah pakhat le pakhat ṭhat hnemnak an pe aw. Pathian ih cirhti nung ihsin a luang mi an siih zumnak hrampi an suah. Pawlpi in himi a sual thei lo mi zumnak ihsin a hngetkhoh mi thuphuan a la.
- Zo ih hnenah zumnak hrampi cu pek a si?
Dungthluntu pawl in zumnak hrampi cu Pawlpi hnenah an pe a si. Thiang Thlarua ih bomnak le lamhruainak in Pawlpi in zumnak hrampi cu cat loin a conhlang. Cun Pawlpi in cuih zumnak hrampi cu theifiang sinsin dingin a zuam ih a nun pi a si.
- Zumnak hrampi cu dikzet ih simfiang dingin zoih hnenah ṭuanvo pek a si?
Zumnak hrampi simfiang dingin dungthluntu Piter ih ṭuanvo aiawh tu, Rome ih bishop (lole Pope) le amah thawn a ṭuan tlang tu bishop pawl hnenah ap a si. Himi Zirhtheinak in thuphuan sungih a um mi thudik sirhsan ih thurin tuah theinak ṭuanvo khal a nei.
- Baibal, Thuanthupi le Zirhtheinak phunthum pawl cu ziangtin peh zom awknak an nei?
Baibal, Thuanthupi le Zirhtheinak cu ṭhen theih loin an pehzom aw thluh. Thiang Thlarau ih cangvaihnak in milai thlarau rundamnak hrangah hmunkhat in hna an ṭuan tlang a si.
