Pope ih thla (2) sung khawm a hoha ding Program an suah a si. Cu pawl cu
1. January (25) St. Paul ih nun thlengawknak puai
2. February (2) Naute Jesuh suah hnu ni (40) kim ni Jerusalem Biakinn sungih ap nak Puai
3. February (18) Nithum Ni, Vutcaam culh ni
4. Pope in kum tin lent can zarh khat nakah a kut thuai ih riantuan tu pawl retreat ah a tel ding.
1. January (25) Ni – Mithianghlim Paul ih nun thlengawknak puai
Hi puaini ah Pope cu Mithianghlim Paul Basilica ah feh in zaanlam thlacam a hoha ding a si. Hi nicu vei (59) nak Khristian pawl rualrem nak hrangih thlacamnak a net nak ni khal a si. Hi zaan thlacamnak ih siarding mi cu Paul in Eph khua ih ca kuat nak 4:4 “Pathian in a lo kawh tikah a lo kawh san mi ruahsannak cu pakhat a si vekin ruanpum pakhat aum ih Thlarau khal pakhat aum” timi kha siar a si ding.
2. February (2) Naute Jesuh suah hnu ni (40) kim ni Jerusalem Biakinn sungih ap nak Puai
Hini ah Pope cu Mithianghlim Peter Basilica ah Missa sumnak a tuah ding a si. Hi ni cu a vei (30) nak thukam pathum lak pawl ih ni (World Day of Consecrated Life) khal a si. Thukam pathum lak tu pawl lungawi rulh nak ni a si vekin cu pawl ih pek hlanawk nak khal a thar ih ruah sal nak ding ni khal a si.
Hini cu Mithianghlim John Paul (2) nak ih rak tuah thok mi a si. A tuah nak san cu thukam pathum la pawl ih a mawi zet mi an nunram kha a thar ih an kilhim thiam nak ding hrang le cu pawl ih pekhlannak nunram kha kawhhran hrang le leilung pumpi hrangah a thupi zet mi laksawng asi thu kha thei thiam ding ah a si.
3. February (18) Nithum Ni, Vutcaam culh ni
Vutcaam culh ni tlawngkai nithum ni (Lent caan a thok ni) cui ni ah Pope cu Rome khua Aventine tlang par ih um Mithianghlim Sabina Basilica ih a um tu Benedictine puithiam pawl thawn missa raithawi nak tuah in vutcaam culh nak a tuah sak ding a si.
Hi ti daan cu Pope John (23) san kum zabi 20 ih rak tuah mi tidan kha kilhim nak a si.
4. Pope in kum tin lent can zarh khat nakah a kut tang ih hnatuan tu pawl retreat ah a tel ding
Lent caan zarhkhatnak ih retreat tuahnak Pope le zung sungih rian a tuan rero tu Puithiam pawl cu kumtin lent can hmaisa bik zarh ih an tuah theu mi retreat tuahnak kha an nei theu. Tui kum retreat tuahnak cu (February 22, 2026) zarhpi niin an thok dingih tlawngkai ninga (February 27) ah an theh ding a si.
Tui kum ah cu a hlan kum vek thotho in Vatican ih leng ah tuah lo in Vatican sung ah an tuah ding a si.
Retreat ih moto cu ‘Pradicate Evangelium’ (Cathianghlim kha simuh) ti a si. Tui Pope ih biaknak thu lam thawi pehpar ih tuanvo a la tu cu Arch Bishop Diego Ravelli a si.
Oliva Mawi
