Mifim pathum puaipi niah Pope Leo XIV in St. Peter Basilica ah zumtu 5,800 thawn Thianghlim Sangkaa (Ruahsannak Jubilee Sangkaa) kharnak canserh a nei.
Pope in Missa a thawh ah Jubilee kum hrangih on mi sangka pawl lakih a netnak St. Peter sangkapi kha a khar a si. Hitin a tuah nak cu a thlengtu siar cawklo mipi pawl hnenah Ruahsannak Jubilee sangka cu khar asinan Jerusalem khuathar ih sangka cu a ong ring ring asi tiah a ti.
Himi tuah nak cu “ Ruahsannak thawn khual a tlawng tu pawl” tin Pope ih kawh mi siar cawk lo mipa le nunau pawl in sangkaa a ong aw ringring mi Jerusalem khuathar lam ah pan in St. Peter biakinnpi ih rat can kha a cawl ter.
Mifim pathum le Herod siangpahrang
Cuisun ah Pope in mifim pathum pawl ih lungawi nak le Herod siangpahrang ih tihphang nak pawl kha tahthim in a sim.
“Bible in Pathian a mah rori a langawk nak thu rel tin in lungawi nak le thinphan nak, elawk nak le thungai nak, tihnak le halnak cuvek a kalh aw mi pawl kha a thup lo” tin a ti. Cuhleiah langnak puaini cu Pathian um ruangih thil ziangkim a mah kel in a taan lo kha a lang ter tin Pope in a sim bet.
Tuisan minung pawl ih hawl hmuh mi
Jubilee kum kha ruat sal in Pope in tuisan minung pawl ih thlarau lam hrang hawl dingin a forhfial.
“ Hi pawl cu zo pawl an si? Ziangthil in an mah kha a forhfial? Ziangmi an hmu ngah? An thinlung, an thusuh nak le an tuar daan pawl cu ziang a si pei” tin thusuh nak a um. Mifim pathum pawl vekin tuisan ah tla harsat nak thawn a khat mi leitlun ah harsat nak pah ih hawl ding kha a tul tin santhar mifim pawl an um lai thu kha thupit in a sim.
Kawhhran dinhmun in hivek minung pawl ih hawl nak kha tih lo in “ manhlat dingin le in mangbang ter thei tu Pathian hnen ih lamhruai dingin” thuthangtha in in dil asi.
“Pathian cu kan tthing theih mi thil asi lo. Pathian cu zuktuh pawl vekin kutsungah fek ten a um tu silo in Nu Mary ih tangsungah naute vekin, mifim pathum pawl ih an biak vekin a nungtu le a nunnak a pe tu Bawi a si ih, in khur ter thei” tin a sim.
Curuangah a thianghlim hmun pawl cu nunnak in pe tu a si ih Jubilee Pathian biak nak pawl cu “Leilungthar pakhat a thok thlang ti mi hngih theih lo mi le nunnak pawl a karh ter ding” tin Pope in sim nak a nei.
Khatlam ih kan zoh sile Herod siangpahrang cu a si nak a taan ding kha a tih ruangah Pathian ih tuahnak par ah a sual lam ih a lehrul. “ Tihnak cun kan mit in caw ter thei” tin ralrin pek nak a nei.
Langnak, langawk nak puai
A netlam ah Pope in Langawknak puai ih a thupi mi cu lei a theih lo mi le tthing a theih lo mi laksawng a si thu a sim. “ Mifim pathum pawl ih biak mi naute cu a man khiah a theih lo mi zangfah nak ih Bawi a si”. Pathian ih langawk nak cu a ropit zet nak hmun ah si lo in a niam bik nak hmun ah a si nan Bethlem khua kha “nang cu mal te lawng na fate a si lo” tin a ti.
“Ruahsannak thawn khual tlawng ti mi a can nak hi mangbangza ngaingai asi. Bangran te ih Pathian biak nak kan neih nak khal hi mangbangza asi” tin Pope in sim bet nak a nei. Thungai ahcun Kawhhranpi cu theih men mi inn pakhat lawng asi lo ih minung pawl ih cawlh nak ding “inn” pakhat dinhmun in a um ringring a sile, Nu Mary ih lamhmuh nak thawn “duhdawt nak ruangah minung sinak a la tu Pathian hmang in a sinak a thleng tu a danglam zet mi mi phun, santhar nonawn” a si lai ding kha a netnak ah a sim asi.
