Catechism of the Catholic church cauk sungta kan run lo hlawm mi asi
ṬHEN KHATNAK
ZUMNAK PHUANNAK
Milai Zumnak
- Pathian in milai hrangah ziang mi tumtahnak a nei?
Pathian cu ṭhatnak le sunlawinak thawn a khat. Cui ṭhatnak le sunlawinak cu milai ih co ve ding a duh ruangah milai a sersiam. Cule a tumtah mi caan a kim in Pathian in sualnak sungih a um mi milai cu a Pawlpi sungah a ko. Thiang Thlarau ih hnaṭuannak thawn milai cu kumkhua nunnuamnak roco tu a fate si thei dingin milai tlentu le runtu dingah a Fapa Jesuh cu leitlun ah a thlah.
Pathian Hrangah Milai ih Thiltuah Theinak
- Ziangruangah milai in Pathian ton duhnak thinlung a nei?
Pathian in milai cu a maih hmuihmel vek in a sersiam ih milai ih thinlung sungah amah hawl duhnak thinlung nei dingin a tuah. Himi Pathian hawl duhnak cu milai in vei tampi thupi ah rel loin um hmansehla, Pathian in cat loin a hnenah a ko ringring. Ziangruangah tile, milai in Pathian hnen lawngin a famkim mi thinlung nomnak a ngah thei ih thuhmaan khal a nun pi thei a si. Pathian ih kawhnak le zaangfahnak ruangin milai cu Pathian thawn an pehthlaih aw thei. Himi pehzom awknak cu milai ih sunlawinak hrampi a si.
- Milai ruahnak in Pathian cu ziangtin kan thei thei?
Leilung le milai sersiam an si thawk ihsin Pathian cu ṭhatnak, mawinak, thudik le thuhman thawn a khat a si, tiah milai ruahnak in kan theithei a si.
- Milai ruahnak lawngin Pathian ih mangbangza kan thei thei maw?
Milai ruahnak lawngin Pathian thu cu famkim ten kan theithei lo. Curuangah biaknak le ziaza thawn a pehpar mi thudik le thuhman siseh, sersiam mi leitlun thilri siseh, thei famkim dingin milai in Pathian ih zaangfah bomnak a ṭul ringring a si.
- Pathian thuthangṭha cu ziang tin kan sim thei ding?
Milai thu le cersiam mi pawlih mawinak le ṭhatnak thu kan ruah tikah a famkim mi Pathian thu cu kan phuang thei a si. Asinan, kan hman mi ṭongfang pawl in mangbangza le famkimnak thawn a khat mi Pathian cu famkim zet in kan sim thei lo. Curuangah kan hman mi ṭongfang cu cat loin ṭha zet le famkim zet ih Pathian thu kan phuan theinak dingin thleng a ṭul ringring a si.
