No. 3

A hlan kum 50 luang ah (1962 kum ah American, Russia le Cuba buai nak ruangah) leilungpi cu Atomic ral thok zuakzo ding dinhmun a thlen laiah upat tlak mi Pope Johan  kul hluan thum nak rak suah mi leilungpi par ah remdaih nak um hram seh. (Peace on earth) ti mi ca pi ah ral thok nak kha hlon in remdaihnak hrangih sawm nak pawl kha an lang ter.

Pope Bawipa in hi capi thawi in leilung pumpuluk ih Catholic kawhhran pawl zate hrang lawng si lo in, thinlung tha nei mi miphun tinkim  le biaknak tinkim ih mi hmuahhmuah hrang tumtah in hi capi a ngan nak a si.

Tui caan ahcun leilung pumpuluk ah kiang le kap dinhmun siatsuah nak cu mizatei ton a si lai caan ah ni, van tlolak ih leilungpi par ih um mi mipakhat cio hrangah ralrin sim nak a si.

Kum 2012 ih ka rak suah mi Gospel thuthangtha ihsin lungawi nak (The Joy of the Gospel) capi ah kawhhran hnatuan pawl kha zohfel in, san thar hrangah a tharhlam mi tidan pawl in kawhhran hnatuan nak pawl kha tuah suah vevo dingah Khrihtian kawhhran in zumtu zaten a rak forhfial asi. 

Himi capi ahcun kan zatei kan tlanlen nak innpi a si mi leilungpi dinhmun in kan ton rero mi thil thawn pehpar in miphun zaten, biaknak tinkim ih minung zate thawn relkawm tlang duh ruang ih ngan mi a si.