Pope Leo XIV in Angelus thlacamnakah ralbuainak ruangih harsat a tuar tu Innsang pawl remdaihnak an ngah thei nak ding hrang thlacam sak. (December 28, 2025)

Jesuh, Maria le Joseph tei ih a thianghlim mi innsang puai ni ih Angelus thlacamnak ah Pope Leo in innsang pawl cu minung pawlkom hrangah tleunak a si thei thu thupit in a rak sim. Tuisan minung pawlkom ah mahte lawng umnak, beidongin thinnaunak, thleidannak pawl le buainak pawl a tam tuk ko nan innsang pawl cu duhdawtnak, zumnak le bomawk tonnak in tleunak bangtukin mi dang pawl kha lamhmuh a thei thu Pope in ralrinnak pe in a rak sim.

December 28, Zarhpi sun, Jesuh, Maria le Joseph tei ih a Thianghlim innsang puaini ah Pope Leo XIV in zumtu pawl hnen leitlunah remdaihnak a um theinak ding thlacam cio dingah zaangfah a rak dil. A hleice in ralbuainak ruangih harsatnak a tuar mi innsang pawl hrang hngilh lo in thlacam dingah khal Pope in thupit in a rak sim.

Bawipa Jesuh ih Christmas tleunak hnuaiah kan mah pawl cu remdaihnak hrangah pehbet in thlacam tlang uh si. Tuini a hleice in ralbuainak ruangih harsatnak a tuartu  innsang pawl, nauhak pawl, kum upa pawl le tihnungza tamzet lak ah harsat a tuartu pawl hrang thlacam tlang uh si. Nazareth khuaih a thianghlim mi innsang ih thlacam saknak hnuaiah kanmah khal bangran ten ap tlang uh si.

Pope in Khristian innsang pawl cu tuini minung pawlkom sungah tleunak a si thei thu kha a rak ruat ter. Tuini minung Pawlkom pawl cu buainak pawl lawng si lo in mahte lawng sinak le lungrual lonak pawl a tam deuh deuh. Pope in Jesuh a rak suah hnu a rei hlan khal ah siangpahrang Herod ih tremhrennak in luat dingah Nazareth khua ih thianghlim innsang cu Egypt ram ih an rak tlangnak kha mangsal dingah hi thilcang in innsang pawl cu zumnak, duhdawtnak, khatlekhat bomtonawknak in harsatnak karlak khal ah minung pawlkom hrangah tleunak an si thei thu ruatsal dingah a rak sim.

Leitlunah Herod vek minung an rak um theu. Maihrang hlawknak ah ziangtuah khal poi lo ti ih ruatin hmuhnak neitu pawl, sumdawnnak ah maihrang lawng ruat in thuneihnak hmangtu pawl, a lenglam lawng a si mi liannak le mizawnruat lo ih ruahnak pawl ruangah leilungpi ah mahte umnak, beidongin thanaunak, thleidannak pawl le buainak pawl kha khatlekhat man nei lo ih an pe aw theu.

Hi mi bumawknakih hmusualnak in Christian innsang pawl sungah duhdawtnak ih meisa kha a mit ter thei lo.

Pope in innsang pawl hnen Gospel Thuthangtha ih manhlat zia kha upat dingah a rak sawm. Thlacamnak, Biakinn ih a hluu peknak ( a hleice in mawhphurh awknak le rinhlelawknak) thawn nitin tongkam le cangvaihnak pawl ah duhdawtnak, tlaitluang zetih thu reltlangnak, rinumnak kha thupit tlang uh si tiah a rak sawm.

Pope in Pathian kutsungin ruundamnak ih hmanrua, duhdawtnak zirhnak le ruahsannak ih tleunak si dingah a rak sawm. Pope in tuini ih Thuthangtha Gospel Cathianghlim sirhsan in Matthew sungta thawn a rak sim. Hi Bible ca sungah Jesuh a suahhnu ah Herod in thah dingah a zuam lai caanah Joseph kha Vancung mi ih langnak hmuhnak in Egypt ah tlan dingah a rak fial tiah a sim.

Pope Leo XIV in siangpahrang Herod cu ralhrang, mi thah hiar tu pa tiah a langter ih a mah cu a mah lawng sinak duhih nungtu a si ih thuneihnak in hrial tuar ding kha tihzetnak hnuaiah a um tu a si tiah a lang ter.

Pope in Herod cu Pathian ih thuanthu ah a tumbik mi mangbangza ruundamnak kha a rak hmu thei lo tiah a rak sim. Herod cu a mai uknak, lennak le thilti theinak pawl sun ding a tih ruangah thudik kha a rak hmu thei lo. Tuisan ih minung pawlkom sungah thanau tu pawl le harsatnak tuartu pawl hrangah zir ding khal ah a rak rel zo thu thuthang an suahnak khal ah a rak lang ter. Pope in a simnakah “a ngaingai ah cun Herod ih lungruhnak cu a thianghlim mi innsang ih umnak le mission hnatuannak ih man kha a langsar ter tiah thupit in a rak sim bet. Tuisan ih minung pawlkom ah tuar mi harsatnak karlakah thianghlim innsang ih manhlat zia le a thuhla thei thei dingah a thupit thu a rak sim.

Pope in “thazaang cahnak, maihrang hlawknak a si mi sumdawnnak leitlunah ruundamnak ih pakhat lawng asi thei mi thufiahnak cu Jesuh Bawipai suahnak le a suahnak inn kha a si ih Pathian cu minung pawl hnen hngalnak nei lo, Laitek neilo in a humhim a si tiah a rak sim.

Pope in Joseph cu Pathian ih tumtah mi kha tlun in Egypt ah “Bawipa Jesuh in leitlun ih a umnak dingah  tuanvo pek mi duhdawtnak thawn a khat ih a thanglian mi si ding ah thazaang peknak a ngah ih leitlun hmuntin ah tleunak thehdarh dingah tha a pe” tiah thupit in arak sim bet. “Joseph ih thungainak le Innsang ih duhdawtnak ih tleunak cu minung pawlkom hrangah cawntlak mi ah a can ter ih ruahsannak tleunak a thehdarh ter” tiah a rak sim.

Pope ih thusimnak a netnak ah Mary le Joseph ih thlacamsaknak in leitlun ih um mi innsang pawl hnenah Pathian in thlasuah pehram seh” tiah thla  a camsak. Pathian thu an thlunnak in innsungsang pawl cu mitin hrangah a mai umnak le a cemthei lo mi a mai duhdawtnak kha thathnem ngai in langter thei dingah lamhmuhnak si dingah tiah a rak sim. Hi mi thu cu Vatican thuthang in a remcang ding zawngin kan ngan mi a si.