Jesu Khrih ih suahnak ah Pathian Fapa ih nunram ziangvek a si ding timi le thinglamtah par ih a thih ding tiangih thuthluknak thupi zet kan hmu thei a si. Hi thuthluknak cu kanmah pawl kha sualnak tangah tanta loin amah Pathian Fapa rori acuih sualnak thilritpi in phurhsak dingih thuthluknak a si. Cumi cu amah pakhat lawngih tuah theih mi thil a si. Hmansehla, cumi rualrual in kanmah lawngih tuah theih mi thil khal in hmuhsak a si: cumi cu kanmaih tuanvo kan lak ve ding mi hi a si. Kanmah tel lo’n in sersiamtu Pathian in kanmah tel lo’n in run lo ding (cf. Saint Augustine, Sermon 169, 11,13). Ti duh mi cu, midang duhdawt ding ih duhhrilnak kan neih lo ahcun in run lo ding tinak a si. Midang a duhdaw lo tu pawl cu rundam an si lo, mihlo an si. Zo khal a hmuh thei mi a unau a duhdawt lo tu cun a hmuh thei lo mi Pathian cu a duhdawt thei lo ding (cf. 1Jn 4:20).

U le nau pawl, tuanvo laknak hi remdaihnak hrangah a fiang mi lamzin a si. Kan zate’n kanmaih dinhmun ih zirin midang mawhphurh bansan ih kanmaih mawhnak vun thei-aw in Pathian hnenah ngaithiamnak kan dil le midang ih harsatnak ngaihsak taktak in mi tlasam le hmuhsuam a tongtu pawl kan dinpi taktak ahcun leilungpi hi a thleng ko ding.

Myanmar in tleunak a hmuh theinak dingin Daihnak Siangpahrang hnenah bomnak dil uh si. Rem-awk salnak a um theinak ding, santhar mino pawl hnenah ruahsannak a karh salnak ding, Myanmar mipi zaten remdaihnak lamzin parah thlenpi ding le beunak nei lo pawl le thaizing  hrang oloksong ih himnak nei lo pawl umpi dingah zangfah dilsak cio uh si.

Ni rei lo teah Jubilee Kum cu a cem thlang ding. Sangka Thianghlim khal khar a si ding. Hmansehla, kan ruahsannak a simi Khrih cun in umpi ringring thotho. Amah cu a khar dahlo mi le Pathian thawi’ nunnak ah in hruaitu Sangka a si. A suakmi Naute cu minung ih cangmi Pathian a si; mawhthluk dingah si loin in run dingin a ra; hmakhat te ra lang duak men si lo in leitlun ah ra cam in amah-le-mah rori pe-aw dingih ra a si. Cucu tuini kan aupi mi Lungawinak Thuthang a si. Minung ih cangtu Pathian sungah hma tinkim damter an si ih mikip ih thinlung in colhnak le daihnak an hmu cio. Bawipai’ suahnak cu daihnak ih suahnak a si.

Nan zaten daihnak le thianhlimnak thawn a khatmi Christmas hmang thei cio dingah duhsaknak ka lo hlan a si.