Pope in Angelus thlacamnakah Mithianghlim Stephen ih in zirh mi cu Martyrdom ( tettikhan nak ih nunnak cemnak ) hi tleunak sungih hrinsal nak a si tiah sim. (December 26, 2025)
Pawpi ih a hmaisabik tettikhan tu asi mi Mithianghlim Stephen puai ni December 26 ni ah Pope in Martyrdom ih thihnak cu Vancung ah hrinsalnak a si tiah a rak sim. Cuihlei ah Christmas ih nuamnak cu tihphannak le buainak thawn a khat mi leitlun pi ah unau thinlung kengih nunnak, ngaidamnak, remdaihnak kha hrilnak a si thu khal thupit in a rak sim.
Pawlpi ih a hmaisabik thahnak a tuartu Stephen puai ni ah Pope Leo XIV in zumtu pawl hnen zumnak ruangih thah tuarnak cu a cemnak a si lo ih a thawhnak dinhmun in ruat dingah a rak sawm. Hi thudik ruangih nunnak cemnak cu Vancungah hrinsal nak asi ih tleunak sungih thlennak cu a ngaingai ah ziang mi a si ti kha a langter a si.
St.Peter tualrawn ih Angelus thlacam ih a ra khawmtu zumtu pawl cibai a buknak ah hlanlai Christian pawl in St. Stephen ih ‘’suah ni” tiih an rak kawh theu mi tui ni ah Pope in “minung cu vekkhat lawng hrin kan si lo”tiah hlanlai zumtu pawl ih zumnak khal mangsal in a rak sim. Zumnak mit ih kan zoh a sile thihnak hman kha a thim mi a si nawn lo tiah a rak sim. Cuitlun ah Pope Leo in “thudik ruangih thihnak cu vancungih hrinsalnak a si” tiah a sim ih a thimnak khuh mi lamzin a si lo ih duhdawtnak thawn tleu nak pek mi lamzin pakhat a si tiah a rak langter.
Tirhthlah pawl ih tuahnak thu le hla kan zoh a sile Pope Leo XIV in a hleice ih ralrin ding mi hmuhnak pakhat a langter. Bawi upa pawl thurelnak hmai ih a dingtu Stephen ih thu a si ih “thurelnak ih a tel tu zate in an zoh thluh tikah a mithmai cu Vancungmi pawl ih hmaivekin an rak hmu” Tirhthlah 6:15 sungah kan hmu thei. Hi thuhla hi Pope in “ hi mi cu thuanthu kha thup lo in duhdawtnak thawn a rak let saltu ih mithmai a si” tiah a sim fiang. Cuitlun ah Stephen in nunnak le thihnak cu Jesuh Khrih a rungcang mi Pathian ih duhdawtnak kha a khawhhmuh ih thimnak sungih a tleu mi tleunak cu a thar in a hmu ter a si tiah Pope in a rak sim.
Bethehem khuapi ihsin thokin a thihnak tiang Pope in a rak langter. Cu mi cu Pathian ih fanu le fapa dinhmun in nung dingih khawhnak a si. Pathian ih fapa a suahnak cu Maria, Joseph le Tuukhal pawlvekin tangdor mi minung pawl kha minungzate hnen a rak langter tiah Pope in a rak sim.
Asinan cu ti vek nunram ih mawinak kha mihrek in an cohlang duh lo, an rak el ti khal in Pope in fiangzet in a rak sim. A thok ihsin a rak um mi a mai a mi hip theinak tleunak cu thuneihnak hrangih a zuam rero tu pawl ih dokalhnak kha a can ter ih thatlonak, diklonak a langter tu sinak le minung pawl ih thinlung sungih tumtahnak pawl a langter mi thatnak ruangah thinnuam lo zet ih a um tu pawl khal a pah ter thei a si. Luca 2: 35 ah ta thawn pehpar in a rak sim.
Pope Leo XIV in Pathian ih hnatuannak cu ziangvek thuneihnak khal in a neh thei lo tiah ngamhnget in a rak sim. Tuisan khal ah Leilungpi hmun tin ah harsatnak phunkim ton a si ko nan thudik thu hman a hriltu pawl, tihnak hnak in remdaihnak kha a thupit sawntu pawl, maihrang thatnak hnak in farah harsa pawl hrangih tuahsak nak a hril sawntu pawl an um lai thu Pope in a rak sim. Hi mi hrilnak in ruahsannak a suahter ih harsatnak lak khal in nuamnak ih a suah ter ti khal in Pope in a rak sim bet.
Pope in a tuicaan ih thudik pawl khal kian a thei lo. A fianglo mi le tuarnak pawl thawn a khat mi leilungpi ah nuamnak kha ngah thei dingah a harvek in ruah tla a si men thei tiah a rak sim bet. Remdaihnak kha rinsan in “Jesuh le a mah tetti a khantu pawl ih hriamhrei tel lo mi lamzin a fehtu pawl” cu a tamsawn in zomtainak, hnontuarnak pawl kha an tong theu ih veikhat hnihah cun “ral lam ih a tangtu pawl tin puhmawh an tong thei theu” tian Pope in a rak sim. A sinan Pope in “Christian pawl ah ral ti mi a um lo” ulenau pawl lawng a um” tiah a sim ih khat le khat theithaim awk lo caan pawl khal ah minung pakhat ciar ih sinak kha a mal lo thu khal thupit in a rak sim.
Christmas ih a thukbik mi ih a laifannak ah unau vekih umnak in a kilhim mi nuamnak a um thu kha Pope in pehbet in a rak sim. Cumi pawl sungah ral tiih ruah mi sungah an tel lo. Pathian ih fale pawl sinak kha siat a theih lo mi sinak kha thei in a cohlang tu pawl an si. Jesuh vekin Stephen cu ngaidamnak thawn a rak thi. A mah a bawmtu thazaang cu hriamnam thazaang hnak in a cak deuh mi a si ih a cui thazaang cu man nei lo ih pek mi duhdawtnak ih thazaang a si ih mipakhat ciar ih thinlung sungah a um cia mi a si. khat le khat ngaihsak ih zoh awknak, cohlan nak thawn zoh thiam tikah a cui thazaang cu a thar in ngah sal a si theu.
A si hi tivek in neta hrinsalnak cu tleunak sungih thlennak a si. Hi mi cu Christmas ti ih kan kawh mi a si tiah Pope in a rak sim.
Pope in a thusim a netnak ah zumtu pawl hnen nunnak pe tu pawl kha a hrinsal ter ih minung sinak kha ngaihsak nak in zumlonak kha zumnak ah a tharin lehrul sal thei mi nunau sungih Maria hnenah a rak ap. Netabik khal ah zoh dingah a rak sawm ih leilungpi kha a mai nuamnak ah hruai ter dingah thla a rak cam. Hi mi nuamnak in tihphannak zate le tihnungza zaten a siat ter thei ih Vur cu nitlang hnuai ah a zup vekin tiah Pope ih a rak sim.
Pope in Jesuh khrih suahnak tleunak hnuai ah remdai le thinnuam ten um theihram uh tiah thla a rak cam. Pawlpi ih a hmaisabik Martyr a si mi St, Stephen kha mangsal in kan zumnak khoh ter dingah le Khrih tetti khan nak ruangih harsat tuartu pawl bawm dingah a rak forhfial. Khat le khat reltlangnak le remdaihnak kha tha a petu pawl hnenah ralthatnak le ngaidamnak ih zohthim thlak mi an hnenah um hram seh tiah a rak sim. Hi mi cu Vatican thuthang in a remcang ding zawngin kan leh mi a si.
