December-25
Hello RVA ihsin Merry Christmas ti a hmaisa bik ah cibai kan run lo buk a si. …….. thuhla ka run sim hlan te ah kan video hi a cem tiang in rak ngaisak dingin le Youtube ah scribe nak, Facebook ah follow, like le Share nak in rak tuahsak dingah zangfah ka run lo dil.
Christmas puaipi cu Bawi Jesuh suah ni lawmnak puaipi a si ih Siangpahrang Constantine in Rome khuapi a rak uk lai, kum 336 hrawng ihsin Christian tampi in Gregorian Calendar vek in December 25 ah an rak hmang thok.
Asinain, hlanlai Christian pawl cun Bawi Jesuih suah ni lawmnak an rak tuah dah lo. Ziangahtile Bawi Jesuih suah ni hi cekci in zo hman in an rak hminsin lo.
Christmas ti mi cafang hi (Middle English) tiih kawh mi mirang san a lai lak hrawngah Christ’s Mass ti duh san a nei mi hlan lai mirang tong in Cristes-messe ti mi in a rung suak mi a si.
Mirang tongih “Christ” ti mi cafang hi “Hriak culh mi” tiih san a nei mi Greek tong in Christos tiin siseh, Hebrew tong in Masiah tiin a si ih mirang tong in Messiah tiin leh mi a si. Curuangah “Christ” le “Messiah” hi a sul lam a bang aw.
Cule Christmas timi hi a tawizawngiin X’mas tikhal in an ngan thotho ih an sullam a bangaw. Christmas ti cu Christ le Mass a kom awk lawng ah Christmas ih sullam a famkim. Christ ti mi cu Khrih ti nak a si ih Mass ti mi cu Missa sumnak a si ih cu mi a um lawng ah Christmas ngaingai tiah kan ti thei.
A liamcia kum 2025 hrawngah Siangpahrang Caesar Augustus in Rome ram sung hmuahhmuah in mipum siar nak tuah dingah mai hrinhnam suahkeh nak khuaah hminpe cio dingin thu a suah.
Joseph cu David ih hrinhnam a si ruangah thi aw dingih an ti mi Maria thawn hmin cazin pe dingah Galilee ram Nazareth ihsin Judrea ram Bethlehem khuapi ah an feh. Cutawkih an um lai ah Maria cu a nau hrin thla a kim ih nau a nei.
An mah cu khualthlennak inn an co nawn lo ruangah cawinn ah an caam. Cule naute cu puante thawn an tuam ih caw rawl khuang sungah an ih ter.
Cui khua ih tuukhaal pawl cu an tuu pawl kil in hramlakah an riak. Pathian ih Vancungmi cu cui tuukhaal pawl hnenah a lang ih “Tu ni ah David khuapi ah Jesuh Khrih ti mi rundamtu cu nan hrangah a suak zo. Puante thawn tuam ih caw rawlei nak kuang sungih an hlummi naute cu nan hrangah hmuhsaknak a si” tiah a rak than.
Cui Vancungmi thawn Vancungmi a dang pawl hmakhat te ah an rung lang ih “Vancung Siangpahrang, kumkhua ih Pathian ih hmin cu kumkhua in thangthat si ko seh. Leilung par ih thinlung tha nei tu pawl hnen khal ah daih nak um hram seh” tiin Pathian thangthat nak hla an sak.
Tuukhaal pawl khal Bethlehem khuapi ah zamrang ten an feh ih cawrawlkuang sungih a it mi naute Jesuh cu an va hmuih an biak.
Cule an hmuh mi le an theih mi Naute ih thu cu hmun tinkim ah an va phuang. Tuukhaal pawl ih sim mi a thei tu hmuahhmuah in an mang a bang thluh.
Maria khalin cui thuhla pawl a ciing ringring ih ralring ten a um. Cule tuukhaal pawl cu an kirih an hmuh mi le an theih mi pawl ruangah Pathian thangthat nak hla sak phah in an tlung.
Tui ni Christmas ni sunglawi ah Naute Jesuh ih thluasuah nan zate parah tlamtling zet in thleng hram seh.
Kan video a cem tiang in rak ngai sak tu an zate par ah Pathian in thlasuah lo pe hram seh.
