Pope Leo XIV in Thai le Cambodian ramri tluan buainak cem dingah thlacam sak. (December 12, 2025)
Thailand le Cambodia ramri tluanah khat le khat doawknak a suah sal ruangah Poep Leo in raldonak pawl cawl dingah zaangfah dilnak a nei ih hliam tuartu zate hrang khal ah thlaza a rak cam sak.
Tlawngkai nithum ni ah Pope Leo XIV in Thailand le Cambodia ramri tluan ih buainak a suahsal ruangah doawknak kha zamrang ten cawl dingah zaangfah a rak dil. Tu naite ih buainak a suahsal ruangah mipi pawl tel in minung tampi a tuahmawh ih an nunnak a cem ruangah an mai inn in suah ter an si.
Tlawngkai nithum ni Mipi a ton ni ih a ra khawmawtu zumtupawl a simnak ah Pope in cui hmunih thuthang suak mi parah a riah a siat tuk thu kha a rak langter.
Thailand le Cambodia ramri tluan ih a cangsal mi buainak ruangah ka riah a sia tuk. Mipi pawl tel in hliam tuar le nunnak cemtu an um ih minung thawngziat hang lo khal an mai inn le Lo tansan in suah ter an si. Hi duhdawt zet mi mipi pawl hrangah thlacamnak thawn naiten a um pi thu khal a langter.
Hi tuahsiat awknak cu kumreipi in rak thok mi a si ih ramri thu el awknak sungih a netabik a suak mi buainak pakhat a si. Ahleice in nunphung ti daan in a thupi mi Biakinn hmun pawl, kiangkap ih elawknak leiram erea ruangah ramhnih karlakah tuletu doawknak a rak suak theu. A hlan ih an lungkimnak pawl le hmunram ih palai pawl zuamnakin ramri ah remdaihnak tuah dingah an zuam ko nan doawknak colhnak thu ah reilo te lawng daih in an thenthek awk sal ih ram mipi pawl kha doawknak karlakah harsatnak an rak tong theu.
Mipi a tonnak a cemnak ah Holy Father (Pope) in hi tivekih tuletu a cannak ruangah a riahsiatnak a langter ih cu mi sungih a teltu zaten” doawknak pawl bangin cawl in thurel tlangnak nei sal dingah” zaangfah a rak dil.
