Khuahlanlaiah khuate pakhatah kutzung thiamzettu bel tuah tu pakhat a um. A tuah mi bel pawl cu an mawi tuk a hmu tin in an porh.
A sinan a mak zetmi cu a tuah mi bel pawl lak ihsin a mawi bikmi bel pi pali cu zohman in an lei lo. Zarh le thla tin in a porh mi hmuhnak dingah a re ko nan zohman in ziangkhal an siar lo ruangah bel pawl cu an riahsia ih an thinnau. An nih cu hman a tlak lo mi bel kan si tin an ruat aw.
Nikhat cu Bel tuahtu pa a um lo lai ah pakhat le pakhat thu an rak rel tlang.
A hmaisa biknak bel in “kei cu a mawi zet mi si ka duh. Milian inn ah um in minung pawl in in porh ciamco ding. A sinan tuih ka dinhmun hi i zoh hnik uh. Zohman ih duh lo mi bel menmen ka si” ati.
A pahnin nak bel khal in “Kan van duai tuk. Kei cu meisa khuar ka si duh, midang tleu nak ka pe duh. Hmuntin ah tleu nak pek ka duh, a sinan vanthatnak ka lam a tang lo. Netabik ahcun zohman ih ziangsiar lo mi bel ka si” tin a ti ve.
Cui hnuah a pathum nak bel khal in a ti ve “kei khal nanmah vekin ka ruat, Kei cu suhbu ka si paih, Minung pawl in paisa thawn khat in in ret ding, A sinan hitawk ah zianghman tangkai lo mi bel pakhat dinhmun in ka um” tin a ti ve.
An pathum ih an tongtheh hnuah an zaten a pali nak bel kha an zoh theh. A nih cu daiten to in a hni.
Bel dang pawl cu an thinheng hai. “Ziang si hni ding um” tin an sut. Nangtla na riahsia ko ding si. Thlathum sung rori zohman in in lei lo si lo maw? tin an sut.
A pali nak bel cun hni phah in a sim mi cu “A si, kei khal ka riahsia, kei khal tumram ka nei ve, kei cu leknak pakhat ka si duh. Nauhak pawl keimah thawn an lek ding, an hni ding, an nuam ding a ti, A sinan vanthat nak cu ka hrangah a dang tumtah nak i neih sak a bang” tin a ti.
“Kan tumram pakhat kan hlawhtling lo tin in nunram in caantha pek mi a cawl ti nak a si lo. Thinsau aw, kan hrangah caantha a thleng hrih lo asi ding” tin a ti.
Thlakhat a liam hnuah thal a rungkim ih khua ih um pawl tidai ret nak ding bel an tul ciamco hai. Bel tuahtu pa khal in cui bel pali cu a ret thotho, Tu ahcun mitin in cui bel pawl cu man tha in an lei hai asi.
Bel pawl cu netabik ahcun an sinak te kha an theithiam thlang. An nih cu minung pawl ih hiar nak kha riam ter dingin le dai ten um ter tu ding an si kha an fiangawk thlang.
Thuanthu ih zirh mi hin nunram hrangah umzia a nei tuk asi. Mitam sawn cu an tumram kha an thlen lo tikah an beidong an thanau. Ziangah hi vek kan can tin mawhpuh ding tul lo mi an mawhpuh an mah le mah khal mi tlasam tin an ruat aw, an hmu aw.
Asinan tumram a tlaksiat tin in a cem nak asi lo, Nunram in lamzin thar in pe ringring asi. A tamsawn cu kan ruahban lo mi lamzin tha in pek theu.
Curuangah tuicaan ah ziangtluk ih a har khal le thinnau hlah, Mah le mah zumawk ding, Thinsau dingin zuam ding, Thil kha a tha lam zawng in hmu ding, zohthiam ding, a zuam rero tu pawl hrangah hlawhtlin nak caan tha timi cu a ra thleng tengteng ding asi.
Credit: Hello it’s Xing Xing
