Tuizarh pi ni November 30, 2025 ni cu Advent tik cu caan kan thleng thlang ruangah Advent thu hla thawn peh par in a tawi zawngin hlawmawknak.
Advent tikcucaan cu Catholic Pawlpi ih hman daan Meisa thleu (Phazawngden) pali ih thlarau lam thawn pehpar awk daan kumtin kan run hlawm zo vekin tuikum khal ah a tawizawngin a thei hrih lo tu pawl hrangah le a theizo tu pawl khal in thinlung tharthawh phah in kan lo hlawm a si.
- A zarhkhatnak Phazawngden (First Candle) (Zarh hmaisabik ih van mi) Phazawngden – Ruahsannak (Hope)
A hmin: Prophet’s Candle (Prophet Phazawngden)
Asan: Hi mi hminsinnak meisa cu ruahsahnak le hngahhlapnak kha a aiawh. Messiah a rat ding thu Isaiah ih a rak sim cia mi kha in thei ter ih in ruat ter a si.
Thulu; Pathian ih thu tiam a kimnak ding ni kha ruahsannak asi.
- A zarhhnihnak – Remdaihnak (Peace)
A hmin -Bethlehem Candle
Asan: Mary le Joseph in Bethlehem ih khual an tlawnnak thu kha in mangter ih naute Jesuh ih rak ken ding mi remdaihnak kha a aiawh a si.
Thulu; Remdaihnak Siangpahrang kan hnenah a suah thei dingah thinlung remnak caan a si.
- A zarhthumnak – Lungawinak (Joy) (ပန်းရောင်)
Ahmin: (Shepherd’s Candle) ( Tuukhal pawl ih Phazawngden)
Asan: Hi mi meisa in lungawinak kha a aiawh a si. Kilkhawinak le daite ih hngahhlapnak in lungawinak thawi hmuahnak ah a thleng ter a si. Hi ni cu lungawinak ni Gaudete Sunday thawn a kaih aw ih “Bawipa cu kan kiangnai ah a um zo ruangah lungawi uh si” tian Pawlpi in in sawm a si.
Thulu; Lungawinak thawi ruahsannak tiah kan ko thei a si.
- Azarhlinak – Duhdawtnak (Love)
Ahmin: Vancungmi ih Phazawngden (Angel’s Candle)
Hi mi cu Pathian ih duhdawtnak cu Jesuh Khrih ih suahnak in a langsar ter ih a aiawh. Vancung mi pawl ih an sim mi “hi leitlunah remnak leng seh, thinlung tha neitu pawl hnenah thleng hram seh” ti mi thuthangtha khal in mangter a si.
A thulu: Pathian in riteek um lo ih duhdawtnak kha a khih hmuh a si.
