Pope in Missa raithawinak ah Leitlun hruaitu pawl hnen mifarah pawl ih tahnak aw an ngaisak a tul, dingnak tel lo in daihnak a um thei lo tiah sim. (November 16, 2025)

Pope Leo XIV in farah pawl hrang Jubilee hminsinnak a rak tuah ih cun miphun hruaitu pawl hnenah mifarah pawl ih an aunak aw kha ngaihsak dingah a forhfial ih dingnak tel lo in remdaihnak a um thei lo tiah tharthawh in a rak sim.

Pope Leo in farah pawl Jubilee Missa cu hoha in a tuah ih St.Peter Basilica tualrawn ah khawm zawhtu minung 6000 hrawng an rak tel. Missa raithawinak a tuah hlan te ah Pope in St.Peter tualrawn ih zumtu minung 20000 kha ding phah in cibaibuknak a rak nei. Khrih kan zumnak ruangah kan pumkhawm ih duhdawtnak tumpi le zumnak tum zet thawn Missa raithawinak ah tel ve dingin a rak sawm.

A thusimnakah Pope in Liturgical kum cu a cem cing ding tiah a sim ih siar mi cathinghlim khal caan cemnak lamthu a khih hmuh thu fiangzet in a rak sim. Prophet Malachi ih a sim mi cu caan cemnak caan cu Pathian caan tiah a langter. Khua a van pek vekin dingfelnak ih tleunak a tleu caan ah farah pawl remdaihnak duhtu pawl ih ruahsannak cu Pathian ih neta bik hlawhman pek ding caan kha asi. Cu mi caanah misual pawl ih tuahnak pawl, dik lo ih nehsawhnak nak pawl a hleice in humhimtu nei lo pawl, farah pawl hrinhronak pawl kha a siatbal dingih hrampi bangin meisa in a kang theh ding tiah a rak sim.

Pope in pehbet in a simmi cu Jesuh Khrih cu dingfelnak ih nitleu a si ih Pathian ih thilti theinak kha a mah rori ih lang ter tu a si. Thuanthu sungah a cang mi thil hmuahhmuah ah Jesuh Khrih cu a cangvai rero tu khal a si.

Pope in a sim mi cu tihnak nei lo in ruahsannak kha ret aw, Pathian in kan Lu ih  Sam phangkhat siat hman a siang lo tiah a sim. Hremnak, farah harnak, kan zuamnak le kan pumpak nunnak le zatlang nun ah hremnak le hremnak karlak ah Pathian in in tlan san lo tiah a sim. Cun Jesuh sungah Pathian ih duhdawtnak in a sannak ah a thleng ih curuangah Khrih in farah pawl hrang nuamnak ah a cannak a si.

Pawlpi in Leitlun farah harsa pawl Jubilee a tuah lai ah Pope in a mai hmaisabik ih a rak sim Dilexi te ti mi mangsal in a sim.

Hi mi hi famkim dingin tuah tik ah Biakinn cu farah harsa pawl hrangah Nu pakhat dinhmun ah si thei dingah le thudik umnak hmun le mitin hrangah cohlannak hmun pakhat si dingin zuam a tul. A hleice in farah nak a tuar rero tu pawl hrangah a si. Pope in Leitlun ah farahnak phunphun a um tiah tiah a sim. Cu mi pawl lak ah thilri farahnak, nun can ziaza lam ih farahnak le thlarau lam farahnak khal a sim ih a hleice in mino pawl kha hnaihnoknak a pe tiah sim.

Pope in zumtu zate hnen online ih um caan siseh, hnatuannak ah siseh, innsang ah siseh midang zoh that dingah a sawm ih hi mi cu Pathian ih duhdawtnak tetti kan hmuh theinak caantha a si tin khal in a rak sim.

Leitlun pumpi kan zoh tikah Pope Leo in Leitlun hmun tinah a cang mi ralbuainak dinhmun kha riahsiat za a sithu a sim ih Hi vek dinhmun ah leitlun pi ah bawmtu nei lo dinhmun sungah a thleng rero ti kha tetti ah a lang in ruah asi tiah thupit in arak sim.

Pope Leo in bomnak a tul tu pawl ih aw kha ram hruaitu upa pawl ngaihsak dingah tha a rak pe. Cu mi aw pawl cu ramkhel lam ih tuanvo neitu pawl in dingfelnak le tuanvo neinak parah ruatsal dingah sawmnak a si thu sawhkhih in a rak sim.

“Thudik a um lo cun remdaihnak cu a famkim thei lo” tiah Pope Leo in a rak sim ih farah pawl ih vaihnak le an au aw pawl in dingfelnak ih a thupi mi kha veitam mi ralrinnak a pek ti khal in a rak sim bet. A sinan cui au aw pawl cu mihrek khat  hrangah a bangaw lo mi “ thatnak ih nuamnak” le thansonak” ti mi in a phen ih mihrek khat pawl cu hngilh ih taan an tuarnak a si thu khal sawh khih in a rak sim.

A thusim a netnak ah Pope Leo in zumtu Christian pawl hnen “midang thawn unau dinhmun in sinak nei mi minung dinhmun pakhat din thei dingah zuam phah in Pathian uknak kha hawl cio uh si” tiah a rak sim. Hi cu Vatican thuthang in a tawizawngin kan ngan mi asi. Casiartu zate parah Pathian thlasuahnak um hram seh.