Nauhak kha tirhfial aw.
Nulepa tin in mai fale cu duh bik a si theu. Asinan “duh tuknak ruangah hnatuan fial siang lo” ti mi ruahnak cu nauhak pawl ih hmailam hrangah tih a nung mi duhdawtnak a si thei. Nauhak kha kan duhdaw ngaingai a si ah cun tirhfial thiam a tul. Hnatuan nak cu an mah harsatnak pek, nauhak tuk lai caan ih harsat pek si lo in tuanvo lak thiam dinhmun pakhat ih tuahsak kha a si.
Ziangruangah hnatuan fial a tul? A thathnemnak, Nauhak pawl kha inn lam hnatuan pawl, an mah thawn a kaih mi tuanvo pawl tuan ternak in an mai hrangah relcawk lo in that hnemnak tampi a suah ter a si.
- Mah le mah rinsanawk thiamnak nauhak lai in tikhuat mah te kholh thiamnak, Kerte (Angki) mah te hruk thiamnak, an mai leh nak a retnak hmun ih ret thiamsalnak ti vek pawl kha an mah thawn pehpar mi pawl mahte tuah thiam, ret thiam dingih zirhnak cu khui tawk an thlen khal le an mah te din theinak an mai thilti theinak a sang ter a si.
- Tuanvo lak thiamnak le daan,
“Tui ni nan tuanvo cu Pangpar bel pawl tidai toih” ti vek in a kum ih zir in tuanvo pek tikah nauhak pawl in an mai tuanvo kha neh dingin tuah thiam theinak thinlung a can ter a si. Hi mi cu Tlawngca, hnatuanak, nunram ih hman tlak mi thilti theinak pawl an si.
- Thilti theinak le thuruahnak thluak lam than liannak,
Pakaan kholh, hnipuan bil, hmunphiat ti vek inn lam hnatuan tuan ternak in nauhak pawl kut le mit ah zohthiam ruahthiam theinak pawl a karh ih hatsatnak pawl khal tuar thiam thei dingih zirhnak thawn a bang a si.
- Innsungsang ih manhlat zia thei thiamnak,
Inn lam hnatuan tuannakin nauhak pawl cu innsungsang sungtel pakhat dinhmun ih a thu pi ih inn ah tuanvo an neih lam an thei aw. Nulepa ih bangnak pawl an theisak ih an parih lungawi thiamnak le innsang ih man nei zia kha tamdeuh in a thei ter a si.
- Thinsaunak le khua huamnak
Hnatuan pakhat kha a thokin a cem tiang tuan thiamnak in tuah sual mi lak in zirh phah in thinsau thiamnak le khuahuamnak a karh ter asi.
Hnatuan fial tikah thei ding mi pawl,
Nauhak kha hnatuan fial tikah duhdawtnak thawn fimzirh ding kha a thupi zet. An kum ih zir in fial thiam an tul. Thahthimnak ah kum 2-3 karlak mi fial tikah an mai lehnak ret sal thiamnak, kum 5 mi in an mai rawleinak Pakan a kholhnak hmun ih ret thiam theinak, kum 8 mi in hnawm hlon thiamnak le hnipuan bil thiam dingih tuahnak vek pawl kha zir an tul a si.
Famkim le tha tuk ih an tuah ding ti cu ruahsan hlah. Nauhak pawl ih tuan mi cu upa ih tuah mi vek cun a famkim lo ding. A thupi bikah an tuahnak kha lungawi pi in lawm thiam tum aw. Tha ten na tuah lo ti ih ti hnak cun ziangtin na tuah ding ti ih thinsau ten a tuah dan zirh kha a tha.
Thil pakhat an tuah theh le lawm aw. A fate mi thil peknak thapeknak pawl tuah sak an tul. Cu mi lawngah tuah duhnak thinlung an nei ding asi. Nuamnak vek in hla ong tahrat in tuan tlangnak, zo in a tuah rang deuh tin Games lek vekin hnatuan kha nuam dingah tuah sak an tul.
Nunau le mipa thleidan lo in inn lam hnatuan kha tuan ter aw.
“Nauhak kha na duhdawt ngaingai le hnatuan fial aw” ti mi ttongfang cu an mah fimnak peknak asi ih hmailam nunram kha tuanvo la thei, mahte tungding aw dingah a hnget khoh mi minung cang dingah lam hmuhnak a si. duhdawtnak kha duhzulhnak ih pek hnak in tuanvo peknak, zirhnak, tel thiam theinak peknak pawl pe aw tiah forh fial phah in. Hi mi thu cu nauhak thluak lam thansonak thu thawn pehpar ih an mi thu in kan ngan mi asi.
