Pope Leo XIV in AI in nauhak pawl le tleirawl pawl olai ten siatsuah thei tiah ralrinnak pe. (November 13, 2025)
Vatican ih Tlawngkai ni li ni hnatuannak daan lam lawng silo in nauhak pawl le tleirawl pawl ih sinak humhim dingah a tul thu a ngaingai ih a tul mi cu a hmanih a tha mi digital tuah daan a sithu Pope Leo XIV in thape in a rak sim.
A sim mi thuah nauhak pawl cu “AI san thar thiamnak in humhim dingah fimnak ngah dingah an tul thu”tiah a sim ih Vatican khuapi ih an tuah mi “ Artificial Intelligence” san ah nauhak pawl le tleirawl pawl ih sinak thawn pehpar mi conference sungih umtu pawl hnen thu a simnak ah a langsar ter mi asi.
AI thiamnak cu fimthiamnak lam, nuam dingih tuahnak le nauhak pawl ih humhimnak tiangin nitin nunram ih a then hrek cu an thlengawknak parah a rak hmu tu Pope Leo in hi thlengawknak cu nauhak pawl ih sinak le harhdamnak kha humhim theinak thawn pehpar mi a thupi mi theih kohnak thusuhnak pawl a suahter tiah a khih hmuh.
Pope in a Cozah pawl, ramtin pawlkom pawl in AI san ah nauhak pawl ih sinak humhim in veng thei dingah daan pawl fumfe in ngan dingah tuanvo an neih thu ralrinnak a rak pe. A thar a suak rero mi digital technology pawl ruangah a cang ih a thar mi harsatnak pawl ruahsan in neih cia mi humhimnak daan pawl a thar in remsal dingah le AI hmannakah khui mi tiang a hman thei ti mi ngamhngetnak pawl khaisangih tuah dingah khal tuanvo an neih thu a tarlang.
Pope Leo XIV in nauhak pawl ih sinak humhim dingah policies lawngih a famkim hrih lo tiah a rak sim. A ti duh mi cu humhimnak ngaingai pe dingah cun digital fimnak khal um lo thei lo a tul thu khal thupit in a rak sim.
Pope Leo XIV in Italy ram ih Catholic Paawlpi thawn pehpar mi pawlkom pathum komkhawm in an tuah mi nauhak pawl humhimnak project pakhat sungah Pope Francis in a rak sim dah mi ttong khal mangsal in a rak sim. A sim mi cu a upa zo tu pawl cu “fimnak pe tu kutthiam nei pawl” tiah an mai tuanvo kha mangsal dingah a tul thu a rak khih hmuh.
Pope Leo XIV in daan thu pawl ngan in tuahdaan hawl dingah a thupi ih cu mi lawng silo in a dang thu lam khal a tul hrih lai thu pehbet in ralrinnak a rak pe.
Pope in XIV in a cemnak ah hi conference in nauhak pawl, tleirawl pawl, mino pawl, Pawlpi le nunphung pawlkom pawl hrang a tuah rero tu tuannak pawl khal felter dingah le a hram thaten din dingah a ruahsan thu a rak sim ih thlasuah peknak a rak nei. Hi mi thuthang cu Vatican thuthang in a tawi zawngin kan ngan mi a si.
