(7) Mi Thil Fir Hlah
503. Thukham pasarihnak in ziang a sim?
Thukham pasarihnak in leitlun thilri pawl upat ding, milai upat ding le sersiam mi pawl upat ding a sim. Pawlpi in milai peh tlaih awknak thawn pehpar aw ih a zirh mi hrampi cu himi thukham sungah a um a si a ti. Cuih a thu zirh mi sungah dik teih sumpai tuahnak ah siseh, pehtlaih awknak le ramthu ah siseh, paisa hlawh tu pawl parah siseh, ram khat le ram khat ṭantlangnak le dingte ih zawnruah nak ah siseh, mi farah pawl duhdawtnak ah siseh dik le hman teih cangvaih ding a si a ti.
504. Ziang vek thu ruangah pumpak in thilri neih a theih?
Thilri pawl dik teih ngah mi a si ah cun pumpak in neih theih a si. Asinan thilri pawl cu milai pawl ih ṭul dan vek ih hman ding a ṭul.
505. Pumpak neih mi thilri pawl ih tumtah mi ziang a si?
Pumpak neih mi thilri pawl in pumpak ih zalennak le upattlak thilti theinak pawl a amkam sak a si. A hleice in mi tlasam pawl bomnak ah thilri neih mi pawl cu hman ding a si.
506. Thukham pasarih nak in ziang tuah in fial?
Thukham pasarihnak in mi dang thilri pawl cu duhdawtnak le lungrualnak thinlung thawn upat dingin in sim a si. A bikin thliri thawn pehpar awih tuah mi thukam mi cu upatnak thawn thlun dingin in forh. Cuvek ṭhiamṭhiam in miih thilri siatsuah mi a um a si le ṭhaten rulh sal dingin hi thukham in in sim hrih. Thukham pasarihnak in tisung le leipar ih um mi ramsa le innzuat sumhnam pawl le thingkung hramkung pawl upat le kilkhawi ding in in sim.
507. Milai in ramsa pawl ziang tin kan kilkhawi ding?
Ramsa pawl cu Pathian ih sersiam mi an si vek in milai in zaangfahnak thinlung thawn a kilkawi a ṭul.
508. Thukham pasarihnak in ziang pawl tuah lo dingin in sim?
Thukham pasarihnak in mi thilri fir lo dingin in sim a si. Hnaṭuan man kimten kan pek lo a si le fifir kan si. Mi thilri siatsuahnak, neih mi thilri ṭhaten hman lonak, ṭhaten hnaṭuan lonak le thilri a lak ih heu ternak pawl hrial dingin hi thukham in in zirh.
509. Pawlpi in pakhat le pakhat pehtlaih awknak thawn pehpar aw in ziang thu pawl a zirh?
Pawlpi in pakhat le pakhat pehtlaih awknak thawn pehpar awih a zirh mi cu Jesuh ih Thuthangṭha simmi milai ih upattlak sinak le ziangkim ih a ṭhansonak ding hrangah tuah ding le thlun ding pawl a si.
510. Ziang vek caan ah Pawlpi cu pehtlaih awknak sungah a tel ve?
Thlarau rundamnak hrangah siseh, mipi ṭhatnak hrangah siseh, sumpai tuahnak le pehtlaih awknak hrangah siseh a ṭul a si le Pawlpi in ziaza thawn pehpar awih thuruahnak le thuṭhennak ah a ṭul dandan in a tel a si.
511. Pehtlaih awknak le sumpai tuahnak cu ziang tin kan ṭuan ding?
Milai pakhat ciar ih ṭhatnak ding hrangah le pawlkom ih ṭhatnak ding hrangah dik te hman zet in pehtlaih awknak le sumpai tuahnak tuah ding a si. Pehtlaih awknak le sumpai tuah tikah milai ih ṭhatnak le ṭhansonak cu a thupi bik ih tumtah mi a si ringring a ṭul.
512. Pehtlaih awknak thawn pehpar aw in Pawlpi ih zirh mi thawn a kalh aw mi ziang an si?
Paisa hawlnak le pehtlaih awknak hrangih tuah mi tawlreldan in milai ih thilti theinak a siatsuah thei a si le pehtlaih awknak thawn pehparih Pawlpi ih a zirh mi a dodal a si tinak a si. Curuangah Pawlpi in Pathian nei lo le mah lawngih ziangkim uk le tuah duhnak pawl a cohlaing lo a si. Midang hrang ruat tel loih pumpak hrang lawng ruahnak le hna ṭuantu pawl parih zaangfahnak nei lonak pawl khal Pawlpi in a cohlang lo a si.
513. Hnaṭuan ih sullam cu ziang a si?
Hnaṭuan cu milai ih ṭuanvo a siih hna kan ṭuannak in Pathian ih hnaṭuannak ah kan tel ve. A ngaingai in kan sim a si le hna kan ṭuan tikah Pathian ih laksawng kan cohlang tinak a si. Cun hnaṭuannak in kan maih hrang, kan inn sungsang hrang le mipi hrangah kan hnaṭuan a si. Pathian ih zaangfah lainatnak laksawng in kan hnaṭuan cu kan thianhlimnak le midang ih thlarau rundamnak hrangah lamzin ah a cang thei.
514. Ziang vek hnaṭuan pawl cu mizapi ih ṭuan ding a si?
Thleidannak ziang hman um loin milai kan mah le kan mah kilkawi awknak ding hrangah hnaṭuan a ṭul. A dik le zalen mi paisa hawlnak cu mi zate hrangah tuah a ṭul a si.
515. Hnaṭuan thawn pehpar aw in acozah in ziang vek ṭuanvo a nei?
Misenpi ih zalennak le pumpak thil neih mi pawl cu acozah in amkamnak tuah a ṭul. Cun a hngetkhoh le rin um paisa hrangah siseh a famkim mi mipi hrangih hnaṭuannak hrangah siseh acozah in amkam nak tuah a ṭul a si. Ziang vek in milai ih thil ti theinak cu paisa hawl nakah hman a si timi zoh le lamzin khih hmuh ding cu acozah ih ṭuanvo a si. Pawlkom in ramsung mipi pawl hnaṭuan ngah thei dingin a bom a ṭul.
516. Sumtuah tu pawl ho tu ih ṭuanvo cu ziang a si?
Sumpai lam le kiangkap thingkung hramkung hrangah sumtuah tu pawl ho tu pawl in ṭuanvo an nei a si. An maih ṭhat hnemnak hrang lawng ruat loin mipi ṭhansonak ding hrang khal a ruah a ṭul.
517. Hnaṭuan tu pawl ih ṭuanvo cu ziang a si?
Hnaṭuan tu pawl in an hnaṭuan mi ṭhazet le zuamzet ih an ṭuan a ṭul. Hnaṭuan hotu pawl hnenah an lungkim lonak a um a si le an mah le mipi ṭhathnemnak ruat in ṭha le dai tein an lang ter thei a si.
518. Ramkhat le ramkhat karah dingfelnak le ṭankhawmnak um thei dingin ziang tuah a ṭul?
Leitlun ramkip ah farahnak mal sinsin dingin siseh, din hmun bang awk lonak mal sinsin ding in siseh, paisa tuahnak ah dingfelnak um sinsin dingin siseh, milai ziang hman ih siar lonak mal sinsin dingin siseh, ramtin le pawlkom tin kim in thinkhat lungkhat in ṭan tlang le ṭuan tlang a ṭul.
519. Ziang vekin zumtu pawl in ramthu le milai pehtlaih awknak ah an tel thei?
Zumtu pawl cu Thuthangṭha nunpitu le dingfelnak le daihnak tuah tu an si bangtukin ramthu le pehtlaih awknak ah an tel thei a si.
520. Ziangruangah mi farah pawl duhdawt a ṭul?
Bawi Jesuh ih tlangparih a thusim mi pawl ruangah siseh a maih nun in mifarah pawl a duhdawtnak ruangah siseh zumtu pawl khal in mifarah pawl duhdawt a ṭul a si timi fiang tein kan hmu thei. Jesuh in, “A nautabik hnenih nan tuah mi cu kei maih hnenih tuah nan si” (Mt 25:40) tiah in sim. Thlarau hrangah siseh tisa hrangah siseh duhdawtnak le lainatnak thawn mimal le misenpi ih an ṭuan mi pawl in Jesuh ih dungtluntu sinak a lang terih mifarah pawl duhdawtnak hrangih ṭuan mi an si.
