Pope in mino pawl hnen Leitlun thleidan awknak karlakah pehtlaiawknak Lilawn saktu si hram uh tiah sim. (November 08, 2025)
Bawi Jesuh in nan ni cu lungrualnak ih tetti langter tu si dingah a lo ko. Nan mah pawl cu pehtlaih awknak Lilawn saktu nan si ih thleidan awknak le rinhlelnak in a khat mi leitlun pi ah khat le khat rinawknak a din tu sihram uh.
Hi mi cu Pope Leo XIV in November 8, 2025 Zarhte ni ah Video Message sungah Slovkia ram ih Kosice khuapi ih St. Elizabeth’s Cathedral Biakinn pi sungih a tongkhawm aw tu mino pawl kha thapeknak ih a rak sim mi a si.
“Nan zumnak kha langter dingah tih hlah uh” nan nunkhuasaknak ah Gospel thuthangtha kha lungawinak thawn nunpi dingah tuah uh. Bawipa thawn nan tonawknak ih a cang mi lungawinakkha hlawm uh” tiah peh bet in a rak sim.
Hi mi puai cu mino pawl ih Jubilee (Jubilee of Youth people) hminsinnak ah archdiocese of Kosice in hoha in a rak tuah sak mi a si. Hi mi puai ah Diocese hotu a si mi Bernard Rober in hoha in Missa raithawinak a rak tuah. Cui hleiah Salovakia ram hrangih Pope aiawh ih ret mi (Apostolic Nuncio) a si mi Archbishop Nicola Girasoli khal a rak tel.
Cu mi puai ah Salovakia Catholic pawlkom Godzone ih nuamnak hman caan le Portuguese ram ih DJ a si mi Father Guilherme Peixhoto ih caanserh hmannak khal a tel. Cu mi DJ cu 2023 kum ih Lisbon ih tuah mi leitlun mino pawl puai khal ah nuamnak caanserh pawl rak tuah tu a si.
Pope in mino pawl hnen hi nan theih thiamnak cu midang pawl hnen hlawm dingah a rak forhfial. Cu mi in “nan zumnak le a tak ih um nak in nan mah kha a lo luatlat ter dingih ziangsiar lo nak kha a lo neh ter ding hleiah thinlung sangkaa ong lo tu pawl hnen duhdawtnak thawn lehrul dingah tha a lo pe ding” tiah a sim.
“Hi thinlung nuamnak ih tetti ah nung aw” tiah Pope in tha a rak pe. Cui hlei ah mino pawl hnen “Khrih ih tleunak” kha innsang, Tlawng pawl, University pawl le pawlkom le hnatuan nak hmun khal ah keng dingah a rak forhfial.
Peh bet in a sim mi cu “hi ti nan tuahnak in Pawlpi hmai le Central Europe ih thinlung sungah nan tleu vivo dingih nan pu nan pa pawl ih zumnak cu tu ni tiang a thar in tleunak a pe thei tu hrampi pakhat dinhmun ah a um lai” tiah tha pe phah in a rak forh fial.
Pope in a video massage cemnak ah a mai Apostolic thlasuah peknak thawn caan a rak cem ter ih cui hmun ih a tel tu zaten Bawinu Maria hnen ah a rak ap. Hi mi cu mino pawl hrang duhsaknak thawn Vatican thuthang ta a tawi zawng le remcang ding zawngin kan ngan mi a si.
