Pope Leo XIV in Palestine President Vatican ah cohlangin tonnak nei. ( November 6, 2025)

Thlawngkai nili ni ah Pope in Palestine President Mahmound Abbasa cu Vatican ah cohlang in a rak tongih Gaza ih a tul tuk mi minung sinak ih um lo thei lo mi pawl bomnak thu an rel. Pope Leo XIV in Pope a tuan hnu ah an mah pahnih karlak ah Telephone thawn biakawknak an rak nei zo nan an mah minung ngai an tonawk cu a tu a veikhatnak a si. An tonawknak ih an rel tlang mi ah Gaza hmun ih mipi pawl hlei ah Israel le Palestine hmun hnihah an buainak khal thupit ih remsak dingah an rel tlang.

President cu Pope Leo XIV nak thawn an tonawk hlanah St. Mary Major Basilica ih Pope Francis ih Thlan ah feh in upat nak a rak pe. President cu kan dung Tlawngkai nithum ni ah Rome ah a rak thleng. A tui tum ih Rome ih a thlen hnuah a hmaisa bikah Pope Francis ih Thlan ah feh in upat sunloihnak a pe. Ziangah tile Pope Francis dinhmuhn in Palestine ram le Palestine mipi pawl hrangih a rak tuah mi pawl a hngilh thei lo ruangah a si tiah a sim. Pope Francis cu zohman ih fial le forh si lo in Palestine kha Rampi pakhat dinhmun a rak ngamhnget. Pope Francis ih Thlan ih upatnak a pek lai ah President le Egypt miphun a si mi Franciscan Ibrahim Faltas khal a rak tel. Thlan ah minutes 15 hrawng upatnak an pek hnuah President in Pangpar tom khat khal ret in upat nak a rak pe.

Palestine President a tu vekih Vatican ih a tlawnnak cu Pope Francis ih Thlan ah upatnak pe ding le tui kum cu Palestine le Vatican karlak ah lum kimnak an dinnak kum 10 kimnak ni khal a si.  A cui lungkimnak Capi cu June 26, 2015 ah lungkimnak lethmat an rak tthu. Cui lungkimnak lakah Jerusalem cu Jews, Christian le Muslim pawl hrangah hminsinnak a si vekin Thlarau lam ah thazaanglaknak a si ti mi lungkimnak pakhat khal a si. Hi mi thuthang cu Vaticcan thuthangin kan ngan mi asi.