(6) Miih Nupi le Pasal Sualpi Hlah
487. Milai in nunau le mipa sinak thawn pehpar in ziang vek ṭuanvo kan nei?
Pathian in milai cu nunau le mipa tin a sersiam ih upattlak sinak ah an bang rep. Cun pakhat le pakhat duhdawtnak thawn um tlang dingin a ko. Zokhal in mipa an sinak lole nunau an sinak cu cohlang ding an siih milai pawl hrangah a thupi a si ti khal an thei a ṭul. Cuih hleiah pakhat le pakhat bawm aw ton ding an si tikhal an thei a ṭul.
488. Thianhlimnak kan timi cu ziang a si?
Thianhlimnak kan timi cu milai in mipa lole nunau a sinak cu ṭhaten a cohlang ih amah le amah a kilkhawi awknak khi a si. Nunau le mipa pawl awknak cu pakhat le pakhat kar lakah ṭhaten hman a si le milai sinak famkim ten a lang ter a si. Thianhlimnak cu Pathian ih laksawng, zaangfah lainatnak le Thiang Thlarau ih rah a si.
489. Thianhlimnak sungah ziang vek ṭhatnak pawl a tel?
Thianhlimnak sungah mah le mah kilkhawi awknak ding hrangih a ṭul mi zirh awknak a tel. Famkim ten cat loih nuncan thleng ringring a ṭul.
490. Thianhlimnak ngah thei dingin ziang pawl an ṭul?
Thianhlimnak ngah thei dingin a tang lamih ta pawl an ṭul a si:
(1) Pathian ih zaangfah lainatnak;
(2) Sacrament pawl in bomnak;
(3) Thlacamnak;
(4) Mah le mah thei awknak;
(5) Supnak;
(6) Ziaza ṭha tuahnak; le
(7) Tisa nomnak supnak pawl an si.
491. Ziang vek in thianhlimnak ih kawh mi kan si?
Khrih ih dung thluntu kan si bang tuk in thianhlimnak sungih um dingah Pathian in in ko. Hrekkhat cu nupi pasal nei loin Pathian hrangah thinlung ṭhenṭhek awknak um loih hnaṭuan thei dingin tiamkam awknak an tuah. Cun mi hrekkhat cu nupi pasal an neiih inn sungsang thianghlim thei dingin an zuam.
492. Thianhlimnak thawn a kalh aw mi sualnak cu ziang pawl an si?
Thianhlimnak thawn a kalh aw mi sual pawl cu:
(1) Miih nupi lole pasal thawn pawl awknak;
(2) Mah le mah tisa nomnak tuahnak;
(3) Zuk ṭhalo zohnak;
(4) Tisa nomnak tuahnak in paisa hawlnak;
(5) Duh lo cingih nunau sualpinak; le
(6) Nunau le nunau lole mipa le mipa pawl awknak tuahnak pawl an si.
493. Ziangruangah thukham paruknak in thianhlimnak thawn a kalh aw mi sualnak tuah lo ding in a sim?
Baibal sungih a um mi thukham pahra sungah nu le pa sualnak nan tuah lo pei (Suahlannak 20:14) tiah a sim. Asinan, Pawlpi ih daanthu in (lole thukham paruk in) Baibal thar le Baibal hlun ih ziaza zirhnak tlun in thianhlimnak thawn a kalh aw mi sualnak pawl hmuahhmuah tuah lo dingin a dawn a si.
494. Thianhlimnak thawn pehpar aw in acozah in ziang vek hnaṭuan a nei?
Thianhlimnak cu milai upattlak sinak khaisang tu pakhat a si ruangah uktu acozah in ramsungih thianhlimnak a um theinak dingin a ṭuan a ṭul. Thianhlimnak siatsuah lo dingin siseh a hleice in mi farah le minau ta pawl kilveng dingin siseh acozah in hnaṭuan a nei.
495. Nu le pa ṭhit umnak ih tumtah mi pawl cu ziang an si?
Nu le pa ih duhdawtnak cu ṭhitumnak sacrament in a thianghlim ter a si. Cuih ṭhitumnak ih tumtah mi pawl cu:
(1) Pakhat le pakhat lungrualnak;
(2) Pakhat le pakhat kar lakah rinum tei umnak;
(3) Ṭhen awk thei lonak; le
(4) Fate neihnak tla an si.
496. A ṭhi aw mi nu le pa ih um tlangnak in ziang mi a khih hmuh a si?
Nu le pa um tlangnak in khih hmuh mi pahnih a nei. Cumi pahnih cu:
(1) Pakhat le pakhat duhdawtnak thawn pumpek awknak le
(2) Fate neihnak an si.
Himi pehtlaih awknak cu Pathian ih tuah mi le nemhnget mi a si ruangah zo hman in ṭhen a theih lo.
497. Ziang tivek caan ah fa neih kan kang ter thei?
A tanglam ih ta pawl an kim ṭheh a si le fate neih kang ter a theih:
(1) Lenglam mi dangih forhfialnak a um lo ding;
(2) Maih duhnak men hmai ah ret lo ding;
(3) Thil thupi zet (ṭhimnak ah damlonak) ruangah a si ding;
(4) Supawknak ruangin a si ding.
498. A dik loih fa phihnak pawl cu ziang an si?
Fate nei thei lo dingih tuah hrimnak lole fate nei thei lo dingih sii einak pawl cu a dik lo zawngih fa phih an si.
499. Ziangruangah a dik lo zawngih fa phihnak le fate nei thei lo dingih tuah cu a dik lo a si?
A dik lo zawngih fa phihnak le fate nei thei lo dingih tuah cu a dik lo a si. Ziangruangah tile fate nei dingih nupi le pasal pehtlaih awknak thawn a kalh aw a si. Cuih hleiah fate nei thei lo dingih thilri kan hman tikah leitlun thiamnak thilri in milai sinak a niam ter a si.
500. Fate parah ziang vek ruahnak kan nei ding?
Fate cu Pathian ih laksawng an si. Cun fate cu Ṭhitumnak ih a sunglawibik mi laksawng khal a si. Fate cu nupi le pasal ih duhdawtnak ih rah si thei nak a nei a si. Cun fate cu milai a si bang tuk in a nu ih pumsungih a sem thok veten upatnak co theinak a nei.
501. Fate nei thei lo innsang nu le pa in ziang an tuah ding?
Fate nei thei dingin a phunphun in an zuam nan fate an nei thei cuang lo a si le midang an cawm, kil khawi, an zoh thei a si. Hivek in an tuah a si le thlarau hrangah ṭhat hnemnak tampi an co ding a si.
502. Ṭhitumnak sacrament dodal tu cu ziang an si?
Ṭhitumnak sacrament thawn a kalh aw mi ziaza pawl cu:
(1) Mi ih nupi lole pasal thawn pawlawknak;
(2) Nupi le pasal ṭhen awknak;
(3) Nupi pakhat hnak ih tam vei khat neih ih neihnak;
(4) Maih inn sungsang mi lole mah thawn nai aw zet tu thawn pawl awknak;
(5) Ṭhitawk hlan ih um tlang cianak; le
(6) Nu le pa sual tuahnak pawl an si.
