(2) Bawipa Na Pathian ih Hmin Cu Zianghmanah Rel Loin Na Um Lo Pei

447. Pathian hmin ih thianhlimnak cu milai in ziangtin upatnak a pek ding?

Milai in Pathian ih hmin thianghlim cu sunlawihnak, thangṭhatnak le lomnak tuahnak in upatnak a pek a si. Curuangah Pathian ih hmin sal in zohman in ṭhatlonak tuah ding a si lo. Cun Pathian ih thianghlim hmin hmang in zohman in camsiatnak tuah ding a si lo.

448. Ziangruangah a hman lomi thu tiamkamnak tuah a ngah lo?

  A hman lomi thu tiamkamnak tuah a ngah lo. Ziangruangah tile mi pakhat in a dik lomi thu tetti khan dingah Thudik le Thuhman a si mi Pathian a sawm thawn a bang awk ruangah a si.

449. Mah le mah bumawk timi cu ziang a si?

Mah le mah bumawk kan timi cu ka thu tiamkam mi ka thlun lo ding a si timi tumtahnak nei cingih thukamnak tuah khi a si. Himi cu sual a si. Ziangruangah tile a thukam mi a thlun ringring tu Pathian a do ruangah sual a si.

(3) Bawipa ih Ni Thianhlim Ter Ding

450. Ziangruangah Pathian in “Sabbath ni cu thlawsuah a pek ih ni thianghlim a si tiah a sim?” (Suahlannak 20:11)?

  Pathian in zarpi ni cu thlawsuah a pekih ni thianghlim a si tiah a sim. Pathian in thil a sersiam tikah a ni sahrihnak ah a cawl a si timi siseh, Isarael pawl cu Egypt ram ihsin sal sungih an luatnak siseh Pathian in a minung pawl thawn a nemhnget mi Thukam siseh milai in kan thei lai a si.

451. Sabath ni thawn pehpar aw in Jesuh in ziang a sim?

  Jesuh in Sabath ni cu ni thianghlim a si tiah a cohlang ih a Pathian sinak hmang in hi tin Sabath niih sullam dik a sim: “Colh ni cu milai hrangah tuah a siih milai cu Sabath ni hrangah tuah a si lo” (Marka 2:27).

452. Ziangruangah Sabath ni (zarhte ni) cu Khristian pawl hrangah Zarhpi (Sunday) ni ah ṭhawn a si?

Colh ni cu Zarhte ni (Sabath) ihsin Khristian pawl hrangah Zarhpi (Sunday) ni ah ṭhawn a si. Ziang ruangah tile:

(1) Zarhpi (Sunday) ni cu Khrih thihnak ihsin a thawhsal ni a si;

(2) Zarhpi ni cu “Zarhkar ih ni hmasabik” (Marka 16:2) a siih sersiam hmasabik thu in mang ter sal a si;

(3) Zarhpi ni cu ni riatnak ni a siih Khrih ih thawhsalnak in sersiam thar a khihhmuh a si.

Curuangah Zarhpi ni cu Khristian pawl hrangah ni hmuahhmuah lakih ni hmasabik le puai hmuahhmuah lakih a thupibik puai a si. Zarhpi ni cu Bawipa ih ni a siih Bawipa in amah ih Lantaak Puai thawn Judah pawl ih thlarau thudik cu a famkim terih Pathian cu milai ih kumkhua colh nak hmun a si timi a phuang suak a si.

453. Milai in ziangtin Zarhpi ni cu a thianghlim ter?

Khristian pawl in Zarhpi ni le a dang ni thianghlim pawl cu Missa sumnak ih telnak in siseh Pathian biaknak tuah thiam lo dingih a kham tu cangvaihnak pawl le hnaṭuannak pawl pialnak in siseh an thianghlim ter a si.

454. Ziangruangah acozah in Zarhpi ni cu puai ni a si tiah cohlang ding a thupi?

Mikip in ṭha teih an colh theinak dingin le biaknak, inn sungsang, nunphung le pawlkom awknak pawl ṭhateih an tuah theinak ding hrangah acozah in Zarhpi ni cu puai ni a si tiah a cohlang ding a thupi a si. Cun milai in thu ruahnak, thinlung dai te ih umnak, thu pakhatkhat zirnak, hnaṭha ṭuannak, a hleice in mi damlo le kum upa pawl vehnak caan ṭha an tuah theinak ding hrang khal ah Zarhpi ni cu puai ni a si tiah acozah in cohlang a ṭul a si.