“NA BAWIPA NA PATHIAN CU NA THINLUNG ZATEN, NA THLARAU ZATEN LE NA RUAHNAK ZATEN NA DUHDAWT PEI”

(1) Keimah Cu Na Bawipa Na Pathian Ka  Si. A Dang Pathian Na Biak Lo Pei.

442. “Kei mah cu nan Pathian Bawipa ka si” (Suahlannak 20:2) timi lungkim ih kan hngetter tikah ziang mi sullam a nei?

Hi vekih kan hngeh ternak in zumtu pawl in zumnak, ruahsannak le duhdawtnak pawl cu kilkhawl ding le cangvai ter ding a si tinak a si. Cuih hleiah hi zumnak, ruahsannak le duhdawtnak thawn a kalh aw mi sualnak pial ding a si timi khal a khih hmuh a si.

  Zumnak in Pathian a zum a si. Culen zumlem lonak, zumlonak, zumdan dik lo, biakmi bansannak le pawl ṭhenṭheknak pawl a hnong a si.

  Ruahsannak in Pathian ih sunmang le bomnak a hngak ih beidongnak a hrial a si.

  Duhdawtnak in ziang hmuahhmuah hnak in Pathian a duhdawt ih poisat lonak, lungawi lonak, thatho loih umnak, zaangzelnak le puarthaunak ihsin a ra mi Pathian huatnak pawl a cohlang duh lo a si.

443. “Bawipa na Pathian cu na upat dingih amah lawng na bia pei” (Matthai 4:10) timi ih sullam cu ziang a si?

Himi ih sullam cu:

• Pathian cu ziang kimih Bawi a si tiah na upat pei;
• Bulpak le pawlkom ih biaknak cu Pathian hnenah na pe pei;
• Pathian hnenah thangṭhatnak, lungawinak le zaangfah dilnak in thla na cam pei;
• Na nunnak le ziang kim Pathian hnenah na hlan pei;
• Pathian hnenih thukam na tuah mi pawl na thlun pei tinak a si.

444. Ziangtin milai in zalen le thudik in Pathian a biak tikah a thilti theinak a hmang?

Milai in thudik hawl dingin, a hleice in, Pathian le Pawlpi thawn pehpar aw in, thilti theinak le ziaza ṭuanvo a nei a si. Thudik a theih le a hmuh suak veten cuih thudik cu a pom hnget le a kilkhawi a ṭul a si. Cun a dikmi biaknak khal cu Pathian a pek a ṭul a si. Cun milai cu upat tlak sinak nei mi a si ruangah Pathian biaknak lam thawn pehpar aw in zo hman in cahnak le thazang tivek hmang in a thinlungih duhlo mi thil bulpak in siseh, zapi theih in siseh, ziang hman tuah tir a theih hrimhrim lo a si.

445. “Keimah siar lo pathian dang nan bia lo pei” (Suahlannak 20:2) timi cu ziang ti can a si?

  Himi thukham in a tanglam ih pawl a dawn a si:

• Pathian tampi biaknak le zuk lem biaknak;
• Khuavang, khuasia le hnaam tivek thawn pehpar ih zumnak;
• Biaknak nei lo;
• Pathian a umlo ti zumnak; le
• Pathian a um a si timi kan theithei lo tiih zumnak pawl an si.

446. “Nanmaih hrangah milem zuk nan tuah lo pei” (Suahlannak 20:3) timi thukham in milem sunsaknak a kham maw?

Baibal hlun sungah Pathian can aiih tuah mi thilri pohpoh cu a kham a si. Asinan, Khristian pawl ih thianghlim zuk pawl upatnak an pek mi cu Pathian ih Fapa milai cannak a laknak in a dik ter a si. Ziangruangah tile cu bangtuk upatnak cu milai cannak a la tu Pathian ih Fapa ih bangbangza ah din suah a si. Hi tiih kan ti tikah zuklem upatnak kan timi siloin cumi zuk ih palai, ṭhimnak ah, Khrih, Thianghlim Mary, Vancung mi pawl le mi thianghlim pawl tivek pawl kan ti duh sannak a si.