A thizotu thlarau pawl hrang thlacamnak ni ( All souls day) November 2,
All Soul’s Day (a thi zotu pawl hrang thlacam ni) cu Catholic biaknnak sungah zumtu a thi zo tu pawl mansal nak duhdawtnak langternak ni a si. cui ni cu November 2 ni ah tuah a si theu. Catholic zumnak ah a thianghlim hrih lo mi sualnak malte a tang lai mi zumtu pawl cu purgatory sungah sual kholhfai nak ( sual thiannak) sungah sual thian fainak an tuar thu zum a si. Lei par ih a tanglai tu zumtupawl in a thizo tu pawl ih thlarau thianghlimnak an ngah ih Pathian hnen an thlen theinak dingah bawmnak pakhat a si thu zum a si. Curuangah cui ni cu an mai hrang thlacamnak tuah dingah Pawlpi in a ngamhnget a si.
Englican Church cun purgatory (hell ramte) thu cu an pom lo nan All Saints Day Mithianghlim pawl ih Puai ni Novenber 1 ni cu an hmang ih an sunloih. All Souls Day (a thizotu pawl hrangih thlacam ni) cu a thi zo tu pawl man salnak hrangih puai ni asi.
Hlanlai ih sin Biakinn pawl ah a thi zotu pawl hrang a hleice in thlacamsaknak ni kha an rak hmang. November 2 cu a thi zotu pawl hrangih an thlarau hrang thlacamnak ni an rak ngam hnget ih Cluny pawlkom (Abbot Yatih) Odilo pawl in kum 1048 ah an rak hmang thok. Cu mi cu kumzabi 13 tlailamah mizapi in run hman a si ih Mithianghlim pawl puai ni ih a thaisun an hman a si.
Biakinn ah November 1 Mithianghlim sunloih nak ni an hman theh hnu a thaisun November 2 ni ah purgatory hell ramte ih sual cawhkuan a tuartu pawl hrangah thlacamsaknak, hman hleicenak ni hman a si.
1915 kum ah Leitlun ralpi veikhatnak in minung tampi an nunnak a cem ruangah Pope Benedict XV (15) in Incruentum altaris sacrifucium ti kawh mi papal bull ti mi capi pakhat a rak suah. Hi capi in Puithiam pawl in All Souls Day (a thi zo tu pawl) hrang thlacam ni ah nikhat sungah veithum tiang Missa raithawinak tuah theinak a rak pe. A kel ah ah ni khatah Missa raithawinak veikhat lawng tuah a si theu.
All Souls Day ah a tamsawn in Requiem Masses tuah a si theu. Puithiam pawl in hi mi ni ah vestments cu a dum, a dup, lole a rangzawng kha an hruk theu. A dum in riahsiatnak a langter ih a dupzawng in sual cawh kuannak a langter, cun a rang zawng in thawhsalnak ruahsannak kha a khih hmuh a si. Ram hrekkhat ah cun innsang pawl in an mai innsangih a thi zo tu pawl ih Thlan ah feh in pangpar an ret sak lole an sunloih ih nunnak cemtu pawl ih thu kha mangsalnak an tuah ih thla an cam sak theu a si. Ahleice in Mexico ram le Latin America pawl ah cun All Souls Day cu a thi zo tu pawl ih ni tiah Puai pakhat dinhmunah le zungpih ni ah an telh a si.
Hi mi a thizo tu pawl hrangih thlacamnak cu 2 Maccabees 12:46, Mt 5: 25-26, 2 Tim 1:16-18, Wisdom 3: 1-9 sungah kan hmu thei a si. A hrek khat cu Lai Bible sungah cun an leh daan thawn a kaih aw lo men ding.
